Klabu ya Uingereza, Tottenham Hotspur, imerudi kwenye Ligi ya Mabingwa Ulaya (UCL) kwa ushindi wa bahati wa 1-0 dhidi ya Villarreal ya Uhispania katika Uwanja wa Tottenham Hotspur, London.
Ushindi huo uliamuliwa na bao la kujifunga la kipa wa Villarreal, Luís Júnior, katika dakika ya nne tu ya mchezo.
Mechi hii inaashiria kurudi kwa Tottenham katika mashindano ya UCL baada ya misimu mitatu, tangu walipocheza mara ya mwisho katika msimu wa 2022/2023. Licha ya kumaliza msimu wa Ligi Kuu ya Uingereza (EPL) katika nafasi ya 17, Tottenham ilipata tiketi ya kushiriki UCL baada ya kushinda Kombe la Uropa (UEFA Europa League) msimu wa 2024/2025.
Mchezo huu ulikuwa wa kwanza kwa kocha mpya wa Tottenham, Thomas Frank, katika mashindano ya UCL. Klabu imekuwa na mwanzo mzuri katika EPL msimu huu, ikishinda mechi tatu na kupoteza moja, na sasa imeanza vyema pia katika UCL. Ushindi huu pia unaifanya Tottenham kuendeleza rekodi yake ya mechi 21 bila kufungwa nyumbani katika mashindano ya UEFA, ikiwa imeshinda mechi 17 na kutoa sare 4.
Timu ya Tottenham iliyoongozwa na Richarlison, Xavi Simons, na Mohammed Kudus ilianza mchezo kwa kasi. Katika dakika ya nne, Lucas Bergvall alipeleka mpira kwenye eneo la penalti, lakini kipa wa Villarreal, Júnior, alishindwa kuudaka na kujikuta akijifunga.
Pamoja na kuongoza, Tottenham haikuweza kuongeza bao la pili, huku mashuti ya Pape Matar Sarr na wachezaji wengine yakishindwa kuingia wavuni. Badala yake, Tottenham ilikabiliwa na mashambulizi ya Villarreal. Katika dakika ya 12, shuti kali la mshambuliaji Nicolas Pépé wa Villarreal lilipita karibu na lango la Tottenham, na hivyo kuwaacha mashabiki wao wakishika tama. Katika kipindi cha pili, Tottenham iliendelea kushambuliwa, lakini walifanikiwa kuudhibiti mchezo na kulinda bao lao la ushindi.
Kwa mujibu wa UEFA, Tottenham ilishika asilimia 58 ya mpira, lakini walishindwa kufanya mashambulizi yenye tija, wakipiga mashuti 9 tu dhidi ya 11 ya Villarreal. Ingawa Tottenham ilikuwa na shuti moja pekee lililolenga lango, Villarreal haikuwa na hata moja.