Mshtuko mkubwa umeikumba dunia ya soka nchini Ufaransa baada ya Bodi ya Usimamizi wa Fedha za Soka (DNCG) kutoa uamuzi wa kuishusha daraja klabu ya kihistoria ya Olympique Lyonnais (Lyon) hadi Ligi Daraja la Pili kutokana na mgogoro mzito wa kifedha. Uamuzi huu umeweka mustakabali wa moja ya klabu kubwa zaidi nchini humo kwenye hatihati, ingawa uongozi wa Lyon umekimbilia kukata rufaa mara moja.
Kwa mashabiki wa soka wanaokumbuka vizuri, Lyon ilikuwa tishio barani Ulaya mwanzoni mwa miaka ya 2000. Walitawala Ligi Kuu ya Ufaransa (Ligue 1) kwa kutwaa ubingwa mara saba mfululizo kuanzia msimu wa 2001-02 hadi 2007-08, rekodi iliyoijengea heshima kubwa. Hata hivyo, hadithi ya mafanikio imebadilika na kuwa ya simanzi.
Chanzo cha matatizo haya kinatajwa kuwa ni tangu klabu hiyo iliponunuliwa na mfanyabiashara wa Marekani, John Textor, mnamo mwaka 2022. Mambo yalizidi kuwa mabaya pale kampuni ya Textor, Eagle Football Holdings, ilipoweka wazi deni kubwa la Dola za Kimarekani milioni 574.85 (sawa na takriban Shilingi za Kitanzania Trilioni 1.5) mwezi Oktoba mwaka jana. Hali hii ilisababisha DNCG kutoa onyo kali mwezi Novemba na kuizuia klabu kufanya usajili wakati wa dirisha dogo la Januari.
Katika harakati za kujinusuru, Lyon imelazimika kuanza kuuza wachezaji wake muhimu na kuachana na wale wenye mishahara mikubwa. Tayari wachezaji tegemeo kama Maxence Caqueret na Rayan Cherki wameuzwa. Isitoshe, klabu imevunja mikataba na washambuliaji wake wa zamani na nyota wenye mishahara ya juu, Alexandre Lacazette, na kipa Anthony Lopes. Zaidi ya hayo, mmiliki John Textor ameamua kuuza hisa zake asilimia 43 anazomiliki katika klabu ya Crystal Palace ya Ligi Kuu ya Uingereza ili kupata fedha za dharura.
Licha ya uamuzi wa DNCG, uongozi wa Lyon umesisitiza kuwa hali yao ya kifedha si mbaya kiasi cha kustahili adhabu ya kushushwa daraja. Wameahidi kuwasilisha uthibitisho wa kuwa na rasilimali fedha za kutosha ili kubatilisha uamuzi huo kwenye rufaa yao.
Iwapo rufaa ya Lyon itakataliwa, itakuwa rasmi kwamba msimu ujao wataonekana wakipambana kwenye Ligi Daraja la Pili. Nafasi yao katika Ligi Kuu itachukuliwa na timu ya Reims, ambayo ilishindwa kwenye mechi za mchujo za kushuka daraja.