Mchezaji nyota wa Paris Saint-Germain (PSG) na mmoja wa mabeki bora wa pembeni duniani, Achraf Hakimi, yupo katika hatari ya kufungwa jela baada ya kuibuka kwa tuhuma nzito za unyanyasaji wa kingono. Kwa mujibu wa ripoti ya gazeti la Ufaransa, 'Le Parisien', mchezaji huyo anakabiliwa na uwezekano wa kifungo cha hadi miaka 15 jela endapo atapatikana na hatia.
Hakimi, ambaye ni raia wa Moroko, anachukuliwa kuwa mmoja wa wachezaji muhimu zaidi katika kikosi cha PSG. Akiwa amelelewa katika mfumo wa vijana wa Real Madrid, amewahi kucheza katika klabu kubwa kama Borussia Dortmund na Inter Milan kabla ya kutua PSG mwaka 2021. Msimu uliopita, alikuwa sehemu ya kikosi kilichotwaa mataji matatu (treble) na ameshinda taji la Ligi Kuu ya Ufaransa (Ligue 1) mara tano. Takwimu zake kwa mchezaji anayecheza kama beki ni za kuvutia, akifunga mabao na kutoa asisti nyingi katika ligi ya ndani na Ligi ya Mabingwa Ulaya.
Chanzo cha Tuhuma
Gazeti la 'Le Parisien' liliripoti kuwa Hakimi anatuhumiwa kumnyanyasa kingono mwanamke mmoja kijana nyumbani kwake karibu na jiji la Paris mnamo Februari 2023. Mwanamke huyo anadai kuwa Hakimi alimgusa bila ridhaa yake, na ilibidi ajipambanue kwa kumpiga teke na kutoroka ili kutafuta msaada.
Ripoti hiyo inaeleza kuwa ingawa malalamiko rasmi hayakuwekwa polisi wakati huo, mwanamke huyo ana ushahidi wa jumbe alizotumiana na marafiki zake zikionyesha alivyokuwa amepatwa na kiwewe baada ya tukio hilo. Wakati uchunguzi wa awali ulipofanyika, Hakimi alikanusha vikali madai yote, na klabu yake ya PSG ilionyesha kumuunga mkono.
Hakimi Anadai Ni Njama ya Kumchafua
Kwa upande wake, Hakimi anasisitiza kuwa hana hatia na anadai kuwa tuhuma hizi ni njama iliyopangwa na mlalamikaji kwa lengo la kujipatia fedha. 'Le Parisien' liliripoti kuwa Hakimi anaamini kuwa watu maarufu na wenye mafanikio mara nyingi hulengwa na watu wenye nia mbaya ya kuwasingizia ili wawape pesa.
Alisema kuwa madai ya mwanamke huyo hayana mashiko na tayari kuna "uongo ambao umeshagundulika." Timu yake ya wanasheria inajiandaa kuchukua hatua zote za kisheria kupambana na tuhuma hizi.
Kwa sasa, ingawa Hakimi yupo likizoni, mustakabali wake upo hatarini. Uamuzi unatarajiwa kutolewa hivi karibuni kuhusu iwapo mashtaka rasmi yatafunguliwa dhidi yake. Endapo kesi itafunguliwa na akapatikana na hatia, sheria za Ufaransa zinaruhusu mshitakiwa kupata kifungo cha hadi miaka 15 jela kwa kosa la aina hii.