Safari ya Timu ya Taifa ya Wanawake ya Tanzania, Twiga Stars, katika Fainali za Mataifa ya Afrika (WAFCON) imefikia tamati kwa uchungu, baada ya kukubali kichapo kizito cha mabao 4-1 kutoka kwa Ghana katika mchezo wao wa mwisho wa Kundi C, uliopigwa usiku wa kuamkia leo nchini Morocco.
Katika mchezo huo wa kufa au kupona, Twiga Stars walionekana kupoteza mwelekeo. Waliruhusu bao la mapema dakika ya 12 lililofungwa na Princella Adubea, lakini walionesha uhai waliposawazisha kupitia kwa Stumai Abdallah dakika ya 41 na kurudisha matumaini. Hata hivyo, kipindi cha pili kilikuwa kigumu zaidi. Mkwaju wa penalti uliopatikana na Ghana dakika ya 63 na kufungwa na Alice Kusi ulionekana kuwavunja nguvu kabisa, na kuruhusu mabao mengine mawili ya haraka dakika za 87 na 90.
Akizungumza baada ya mchezo, Kocha Mkuu Bakari Shime, alikiri kuwa timu haikuwa kwenye ubora wake na alitaja sababu tatu kuu za kipigo hicho.
"Kwanza, haikuwa mechi nzuri kwetu. Tumeshindwa kurudi kwenye shepu yetu baada ya kutumia nguvu nyingi kwenye mchezo uliopita dhidi ya Afrika Kusini," alisema Shime.
"Pili, kuruhusu bao la mapema na kisha penalti baada tu ya kusawazisha kulituondoa mchezoni kisaikolojia. Na tatu, majeraha kwa wachezaji wetu muhimu wakati wa mchezo yalitugharimu, na mabadiliko tuliyofanya hayakuweza kuisaidia timu ipasavyo," alifafanua.
Twiga Stars inamaliza kampeni yake ikiwa na alama moja tu, iliyoipata katika sare ya kufutia jasho ya 1-1 dhidi ya mabingwa watetezi Afrika Kusini. Walipoteza mchezo wa kwanza kwa bao 1-0 dhidi ya Mali, na kuhitimisha kwa kipigo hiki cha 4-1.
Katika kundi hilo, Afrika Kusini imeongoza ikiwa na alama saba, huku Ghana ikifanya maajabu ya kufuzu kama mshindi wa pili kwa pointi nne, ikiizidi Mali kwa tofauti ya mabao. Licha ya kutolewa, Kocha Shime amesema wamejifunza mengi na watarejea wakiwa imara zaidi katika fainali zijazo.