Baada ya msimu mmoja kwenye Ligi ya Championship, klabu kongwe ya Mtibwa Sugar imerejea rasmi Ligi Kuu Tanzania Bara na imetuma salamu kwa wapinzani wake kuwa haijarudi kama wasindikizaji. Miamba hiyo ya Turiani, Morogoro, imeanza kwa kukiimarisha kikosi chake kwa umakini, ikianzia na ununuzi wa mshambuliaji aliyewika msimu uliopita wa Championship, Kassim Shaibu, anayefahamika kwa jina la utani 'Mayele'.
Usajili wa Shaibu kutoka klabu ya TMA Stars umepokelewa kwa shangwe na mashabiki wa "Wakata Miwa", hasa kutokana na sifa zake za ufungaji mabao zilizomfanya afananishwe na aliyekuwa nyota wa Yanga, Fiston Mayele. Hii ni ishara tosha kuwa Mtibwa inataka kuongeza makali kwenye safu yake ya ushambuliaji ili iweze kuwa timu shindani itakaporejea dimbani, ambapo mchezo wao wa kwanza utakuwa dhidi ya mabingwa watetezi Yanga, tarehe 29 Oktoba mwaka huu.
Afisa Habari wa klabu hiyo, Thobias Kifaru, ameweka wazi kuwa kila hatua ya usajili inafanywa kwa kufuata mapendekezo ya benchi la ufundi linaloongozwa na Kocha Mkuu, Awadh Juma. "Tunataka kuwa timu shindani. Tumejifunza mengi baada ya kushuka daraja, na sasa tunafanya usajili kwa umakini mkubwa kuhakikisha tunajenga kikosi imara," alisisitiza Kifaru.
Mbali na kunasa saini ya 'Mayele' mpya, Mtibwa Sugar inaendeleza mkakati wa kuwarejesha nyumbani wachezaji wake wa zamani wanaoijua falsafa ya klabu. Tayari imemtangaza rasmi kiungo Ismail Aidan Mhesa. Vilevile, zipo taarifa za kuaminika kuwa klabu hiyo ipo katika hatua za mwisho za kumrejesha winga wao mahiri, Jimson Mwanuke, kutoka Singida Black Stars.
Ili kujenga timu yenye uwiano, maboresho yamefanyika pia katika maeneo mengine, ambapo tayari wametangazwa kiungo fundi Ezekia Mwashilindi kutoka Tanzania Prisons pamoja na beki wa kulia mwenye nguvu, Datius Peter, aliyesajiliwa kutoka Kagera Sugar. Usajili huu unaonyesha dhamira ya Mtibwa ya kutaka kurejesha heshima yake baada ya kupanda tena daraja kufuatia kushuka msimu wa 2023/24.