Kiungo mshambuliaji wa Tottenham Hotspur, Richarlison, anaendelea kuonyesha kiwango cha kuyumbayumba msimu huu, huku klabu yake ikibanwa na sare ya 1-1 dhidi ya Wolverhampton Wanderers (Wolves). Matokeo haya yaliifanya Spurs kubaki katika nafasi ya tatu kwenye Ligi Kuu ya Uingereza (EPL) na pointi 11, huku Wolves wakiendelea kushika mkia na pointi moja tu.
Mchezo huo uliochezwa katika Uwanja wa Tottenham Hotspur, London, ulishuhudia Tottenham ikisumbuliwa. Katika dakika ya 27, waliamini wamepata bao la kuongoza kupitia kwa Mohammed Kudus, lakini bao hilo lilikataliwa kwa sababu ya offside. Baada ya bao kukataliwa, Tottenham ilitingishwa tena katika dakika ya 54, pale Santiago Bueno alipoifungia Wolves bao la kwanza. Bueno alifunga kirahisi baada ya mpira wa kichwa kutoka kwa Ladislav Krejčí kugonga mlinzi wa Tottenham.
Hata hivyo, Tottenham ilionyesha moyo wa kupambana hadi mwisho. Katika dakika za nyongeza, João Palhinha alifunga bao la kusawazisha kwa shuti kali la mguu wa kulia, na kuokoa angalau pointi moja kwa timu yake.
Ukosoaji Mkubwa kwa Wachezaji
Vyombo vya habari vya Uingereza, vikiwemo BBC, vilieleza kuwa Tottenham ilikuwa "dhaifu" katika mchezo huo, ikijitahidi kupata nafasi. Walisema Palhinha ndiye pekee aliyeizuia Wolves kupata ushindi wao wa kwanza msimu huu. BBC iliwapa wachezaji wa Tottenham alama za chini za 4 hadi 5, huku Palhinha akipata alama ya juu zaidi ya 5.93.
Kwa upande mwingine, Richarlison, ambaye alianzishwa katika mchezo huo, alipata alama ya chini kabisa kati ya wachezaji walioanza, 4.24.
Utata Unaoendelea wa Richarlison
Richarlison alijiunga na Tottenham msimu wa kiangazi wa 2022 akitokea Everton kwa gharama ya pauni milioni 60 (takriban TZS bilioni 198). Hata hivyo, mchezaji huyo amekuwa akikabiliwa na majeraha na kushindwa kuonyesha kiwango chake. Msimu wa 2024/2025, alifunga mabao manne tu na kutoa pasi moja ya bao katika mechi 15 za EPL.
Mambo yalionekana kubadilika baada ya kuanza kwa msimu huu, ambapo alifunga mabao mawili katika mechi ya kwanza dhidi ya Burnley, na kuonyesha utendaji mzuri dhidi ya Manchester City. Lakini baada ya mechi dhidi ya Bournemouth, alama zake ziliporomoka tena hadi 3.25. Mienendo yake inamfanya aonekane kama mchezaji anayeyumbayumba katika kila mechi.