Timu ya Manchester City imeibuka na ushindi muhimu dhidi ya wapinzani wao katika kuwania nafasi ya kushiriki Ligi ya Mabingwa Ulaya (UEFA Champions League - UCL) msimu ujao, Aston Villa, katika mchezo mkali wa Ligi Kuu ya Uingereza (EPL).
Katika mchezo huo wa raundi ya 34 ya msimu wa 2024-25, uliopigwa Jumatano, Aprili 23, 2025 kwenye uwanja wa Etihad jijini Manchester, Man City walipata bao la ushindi katika dakika za lala salama kupitia kwa kiungo wao Matheus Nunes, na kufanya matokeo kuwa 2-1.
Ushindi huu wa tatu mfululizo ligini unaifanya Man City kufikisha pointi 61 (michezo 34, wakishinda 18, sare 7, kufungwa 9) na kuimarisha nafasi yao ndani ya tano bora, nafasi ambazo zinatoa tiketi ya kushiriki UCL msimu wa 2025-26 kwa timu za Uingereza. Kwa sasa, EPL imepewa nafasi tano za kushiriki michuano hiyo mikubwa barani Ulaya.
Kwa upande wao, Aston Villa walisalia katika nafasi ya saba wakiwa na alama 57 (michezo 34, wakishinda 16, sare 9, kufungwa 9), hivyo kupata pigo katika harakati zao za kufuzu kwa UCL.
Mchezo ulianza kwa kasi huku Aston Villa wakionekana kutaka kupata bao la mapema, lakini shuti lao kali liligonga mwamba na kuwanyima fursa ya kuongoza mchezo. Baada ya kunusurika kufungwa, Man City walijibu mapigo na kufanikiwa kupata bao la kuongoza dakika ya saba tu kupitia kwa Bernardo Silva. Mreno huyo alimalizia kwa ustadi kazi nzuri iliyofanywa kwenye eneo la hatari la Villa.
Hata hivyo, furaha ya Man City haikudumu kwani Aston Villa walisawazisha dakika ya 18. Baada ya mchezaji wao kuangushwa kwenye eneo la hatari, mwamuzi aliamuru penalti ambayo ilifungwa na kuurejesha mchezo katika usawa.
Kipindi cha pili kilishuhudia makocha wakifanya mabadiliko ili kusaka ushindi. Aston Villa waliwaingiza wachezaji kama John McGinn na Ollie Watkins kuongeza nguvu kwenye safu ya ushambuliaji, huku Man City wakimleta Jérémy Doku ili kuongeza kasi pembeni. Timu zote zilishambuliana kwa zamu lakini mabao yalikosekana, na ilionekana kama mchezo ungekamilika kwa sare ya 1-1.
Lakini, dakika chache kabla ya filimbi ya mwisho, Matheus Nunes aliibuka shujaa wa Man City. Baada ya Doku kupenyeza mpira kutoka upande wa kushoto, Nunes alipokea pasi ndefu upande wa kulia na kupiga shuti kali la mguu wa kulia lililomshinda kipa wa Villa na kuipa timu yake pointi zote tatu muhimu. Hili lilikuwa bao la kwanza kwa Nunes akiwa na jezi ya Man City tangu alipojiunga na timu hiyo akitokea Wolverhampton Wanderers mwezi Septemba 2023, na alilifunga katika wakati muhimu sana.
Chanzo cha picha: AFP