Mambo si mambo kaskazini mwa London! Wakati mashabiki wa soka nchini Tanzania wakijipanga kwa ajili ya sikukuu za mwisho wa mwaka, klabu ya Tottenham Hotspur imejikuta ikipita katika kipindi cha "toba" baada ya kichapo cha mabao 2-1 mikononi mwa Liverpool. Kichapo hicho si tu kimeumiza mioyo ya mashabiki wa 'Spurs' pale Kariakoo na Posta, bali kimeishusha timu hiyo hadi nafasi ya 13 kwenye msimamo wa Ligi Kuu ya Uingereza (EPL) ikiwa na alama 22 pekee.
Hata hivyo, gumzo kuu katika mitaa ya London na kwenye kurasa za vyombo vya habari kama BBC, siyo tu matokeo ya uwanjani, bali ni mwenendo wa "kiranja mkuu" wa timu hiyo, Cristian Romero. Tangu kuondoka kwa gwiji Son Heung-min aliyetimkia klabu ya LAFC nchini Marekani, Romero alikabidhiwa kitambaa cha unahodha na kocha Thomas Frank. Lakini, badala ya kuwa mfano wa nidhamu, Romero amekuwa "mteja" wa kadi nyekundu na njano, jambo linalozua maswali kama kweli anastahili uongozi huo.
Mvua ya Kadi na Utovu wa Nidhamu
Katika mchezo huo dhidi ya Liverpool, Tottenham haikupoteza pointi tatu tu, bali ilipoteza pia nidhamu ya mchezo. Mapema dakika ya 33, mshambuliaji Xavi Simons alionyeshwa kadi nyekundu baada ya kumkanyaga vibaya beki wa Liverpool, Virgil van Dijk. Ingawa awali mwamuzi alitoa kadi ya njano, teknolojia ya VAR iliamua Simons lazima "akakae benchi" mapema.
Baada ya Simons kutoka, Tottenham ilizidiwa na kuruhusu mabao kutoka kwa Alexander Isak na Hugo Ekitike. Licha ya Richarlison kurudisha bao moja, hali ilizidi kuwa mbaya dakika za lala salama. Kapteni Romero, ambaye alipaswa kutuliza wenzake, alijikuta akitolewa nje kwa kadi ya pili ya njano baada ya kumsukuma kwa fujo Ibrahima Konate. Kabla ya hapo, Romero alikuwa tayari ameshaonywa kwa kadi ya kwanza baada ya kulalamika kwa ukali kufuatia bao la Ekitike.
Takwimu Zinazomponza Romero
BBC wamechimbua takwimu zinazomfanya Romero aonekane kama "mchezaji hatari" uwanjani. Katika michezo 114 ya EPL aliyocheza, Romero amejizolea kadi za njano 34 na kadi nyekundu 3. Msimu huu pekee, Tottenham imepata jumla ya kadi za njano 42, na asilimia 21 ya kadi hizo (yaani kadi 9) zimetoka kwa Romero pekee!
Mchambuzi na mchezaji wa zamani, Jamie Redknapp, amemponda Romero akisema, "Haya ni mambo ya kawaida kwa Romero. Kuingilia waamuzi na kurusha miguu hovyo ni tabia yake. Ingawa Konate alimchokoza kidogo, nahodha hapaswi kuitikia chokochoko hizo kwa fujo."
Naye kipa wa zamani wa Spurs, Joe Hart, aliongeza kuwa timu hiyo ilipoteza udhibiti wa hisia zao (control). Alisisitiza kuwa wakati Richarlison akipambana kurudisha hali ya mchezo, vitendo vya utovu wa nidhamu vya akina Simons na Romero vilivuruga kila kitu na kuifanya Spurs kupoteza mechi ya pili mfululizo ligini.