Kocha mkongwe na mwenye mafanikio makubwa barani Ulaya, Carlo Ancelotti, huenda akajiuzulu kibarua chake ndani ya klabu ya Real Madrid na kutimkia nchini Brazil kuchukua jukumu la kuinoa timu ya taifa ya nchi hiyo, maarufu kama Seleção. Taarifa kutoka kwa chombo cha habari cha The Athletic zinaeleza kuwa kuna uwezekano mkubwa kwa Ancelotti kukubali ofa ya Shirikisho la Soka la Brazil (CBF).
Mapema mwezi Machi, iliripotiwa kuwa Brazil ina hamu kubwa ya kumpata Ancelotti ili awaongoze kwenye kampeni za Kombe la Dunia la mwaka 2026. Vyanzo ndani ya CBF vimemwelezea kocha huyo raia wa Italia kama "chaguo lao la ndoto" kuchukua nafasi iliyoachwa wazi baada ya kumfuta kazi kocha Dorival Júnior mwezi Machi. Brazil inataka kupata kocha mpya haraka kabla ya kurejea kwa mechi za kimataifa za kufuzu Kombe la Dunia.
Ingawa Ancelotti ana machaguo mengine mezani, ikiwemo kubaki Real Madrid, inaarifiwa kuwa anavutiwa zaidi na wazo la kuiongoza Brazil. Sababu moja kubwa ni kwamba tayari anawafundisha baadhi ya nyota muhimu wa Brazil katika kikosi chake cha Real Madrid, wakiwemo Vinícius Júnior, Rodrygo, na Éder Militão, jambo linaloweza kurahisisha kazi yake.
Ancelotti anatazamwa kama mmoja wa makocha bora zaidi duniani, hasa kwenye michuano ya Klabu Bingwa Ulaya (UCL), ambapo anashikilia rekodi ya kuwa kocha pekee aliyetwaa taji hilo mara tano (mara mbili akiwa na AC Milan, na mara tatu akiwa na Real Madrid katika vipindi vyake viwili). Akiwa na Real Madrid pekee, amefanikiwa kushinda mataji matatu ya UCL, mawili ya Ligi Kuu ya Hispania (La Liga), na mawili ya Kombe la Mfalme (Copa del Rey), miongoni mwa mataji mengine mengi yaliyomfanya kuwa mmoja wa makocha bora katika historia ya klabu hiyo.
Hata hivyo, msimu huu mambo hayajamuendea vizuri Ancelotti pale Santiago Bernabéu. Licha ya kumsajili nyota Kylian Mbappé, timu hiyo ipo hatarini kumaliza msimu bila taji kubwa. Wameachwa nyuma na Barcelona kwenye mbio za La Liga na walipata kipigo cha aibu kutoka kwa Arsenal kwenye Ligi ya Mabingwa Ulaya na kutolewa. Ingawa wamefika fainali ya Copa del Rey, watakutana na wapinzani wao wa jadi, Barcelona, hivyo ushindi hauna uhakika.
Kutokana na mwenendo huo, kuna taarifa kuwa uongozi wa Real Madrid unafikiria kuachana na Ancelotti na unamtazama gwiji wao wa zamani, Xabi Alonso, ambaye kwa sasa anang'ara akiwa kocha wa Bayer Leverkusen, kama mrithi sahihi. Hali hii inamweka Ancelotti katika wakati wa kutafakari mustakabali wake, huku Brazil ikiendelea kumshawishi kwa nguvu zote.
Brazil imekuwa ikisuasua kimatokeo na kimchezo tangu kuondoka kwa kocha Tite, jambo lililozua kutoridhika kukubwa miongoni mwa mashabiki. Taifa hilo linalotarajiwa kupigania ubingwa wa dunia limekuwa likipata shida hata katika mechi za kufuzu za Amerika Kusini. CBF inaamini kuwa kumpata Ancelotti, anayewafahamu vyema nyota wao wakuu, kutabadilisha hali ya hewa na kurejesha matumaini.
The Athletic inaripoti kuwa Ancelotti alipanga kuzungumzia mustakabali wake baada ya mchezo wa fainali ya Copa del Rey dhidi ya Barcelona. Iwapo mabadiliko ya kocha yatafanyika Real Madrid, Xabi Alonso ndiye anayepewa kipaumbele cha kwanza kumrithi.