Waziri wa Katiba na Sheria, Dkt. Damas Ndumbaro, amewahimiza wananchi wa mkoa wa Kagera kuacha woga na kuwafichua hadharani wahalifu wanaowafanyia dhuluma katika jamii zao. Alitoa wito huo wakati akizungumza na wananchi wa kata ya Nsunga, wilayani Missenyi, katika kampeni ya msaada wa kisheria ya Mama Samia.
Dkt. Ndumbaro aliwataka wananchi wasisite kueleza matukio ya unyanyasaji na ukatili yanayowakumba, akisisitiza kuwa kampeni hiyo imelenga kuondoa changamoto zote za kisheria zinazowakabili wananchi.
"Muda wa kuwafichua wahalifu ni sasa. Baadhi ya watu ni wanyanyasaji, wengine wananyang'anya watu ardhi, wanawanyanyasa wajane, wanafanya ubakaji na ulawiti. Ninawahakikishia wananchi kuwa kampeni hii haitaacha changamoto yoyote ya kisheria bila kutatuliwa. Tunasisitiza haki, usawa, na maendeleo," alisema Dkt. Ndumbaro.
Alieleza kuwa hapo awali, wananchi walikuwa wakisumbuka kutafuta wanasheria na mawakili ili kupata huduma za kisheria. Hata hivyo, kwa sasa, wanasheria na mawakili ndio watakaowafuata wananchi katika vijiji vyao. Lengo la Rais Samia Suluhu Hassan ni kuhakikisha Watanzania wanapata haki zao bila usumbufu.
Aidha, Dkt. Ndumbaro alifurahia hatua ya serikali kujenga jengo la mahakama katika wilaya ya Missenyi, ambalo lilikuwa ni changamoto kubwa kwa miaka mingi. Aliamini kuwa uwepo wa mahakama hiyo utarahisisha upatikanaji wa haki kwa wananchi ambao walikuwa wakilazimika kusafiri umbali mrefu hadi mahakama ya wilaya ya Bukoba.
Naibu Katibu Mkuu wa Wizara ya Katiba na Sheria, Bw. Frankilini Rwezimula, alieleza kuwa huduma za kisheria kupitia kampeni hiyo zitadumu kwa siku tisa katika wilaya ya Missenyi. Kila siku, timu itasikiliza kero na changamoto za kisheria kutoka vijiji vitatu ndani ya kata moja.
"Nawaomba wananchi wajitokeze kwa wingi kuleta kero zao za kisheria ili zipate ufumbuzi. Sio tu kero, bali pia kupata elimu ya kisheria ili kujua hatua za kuchukua. Serikali itawasaidia kupata wanasheria watakaowasaidia kupata majibu ya haki zao. Tusikae kimya kwa mambo yanayotuumiza," alisema Bw. Rwezimula.
Mbunge wa Jimbo la Nkenge, Bw. Frolent Kyombo, alieleza kuwa kampeni hiyo ni fursa muhimu kwa wananchi wa Missenyi, kwani wengi wao hawana uwezo wa kugharamia huduma za wanasheria. Aliamini kuwa wananchi watapata suluhu kwa changamoto zao kupitia kampeni hiyo, kwani baadhi ya kesi zao zimeshindwa kuendelea kutokana na ukosefu wa fedha za kuwalipa mawakili.
Bw. Kyombo aliwahakikishia wananchi kuwa kampeni hiyo ina majibu kwa matatizo yao yote, na kuwataka wasikose kujitokeza. Aliishukuru serikali kwa kujenga jengo la mahakama wilayani Missenyi, akieleza kuwa wananchi wengi wanyonge hawakuwa na uwezo wa kusafiri hadi mahakama ya wilaya ya Bukoba. Uwepo wa mahakama ndani ya wilaya hiyo utahakikisha wananchi wanapata haki zao kwa wakati.