Wakili maarufu Onesmo Olengurumwa ametoa ushauri kwa uongozi wa Chama cha Demokrasia na Maendeleo (CHADEMA) kuwapa nafasi ya kusikilizwa wanachama waliojiunga na kundi linalojulikana kama G-55 ndani ya chama hicho. Amesisitiza umuhimu wa kufanya mazungumzo ya pamoja ili kuendeleza utamaduni wa kubadilishana mawazo na kutatua tofauti kwa njia ya amani.
Kupitia akaunti yake ya mtandao wa kijamii wa X, Olengurumwa, ambaye pia ni Mratibu Kitaifa wa Mtandao wa Watetezi wa Haki za Binadamu Tanzania (THRDC), alielezea uzoefu wa kihistoria nchini akitolea mfano kundi la Wabunge 55 (G-55) ndani ya Chama Cha Mapinduzi (CCM) miaka 30 iliyopita. Kundi hilo, lililoongozwa na Mzee Njelu Kasaka, liliibua hoja mbalimbali bungeni, ikiwemo muundo wa Muungano. Serikali ya wakati huo iliunda kamati iliyowajumuisha viongozi wakuu kama Mzee Sita, Edward Lowasa, Anne Makinda, na Seif Khatib kuwasikiliza, lakini mwafaka haukupatikana hadi Baba wa Taifa, Mwalimu Julius Nyerere, alipowaita na kuwasikiliza pamoja na Waziri Mkuu wa wakati huo, John Malecela.
Akitoa ushauri wake, Olengurumwa alisema kuwa kama hata katika mfumo wa chama kimoja watu waliweza kujitokeza na kutoa maoni yao kwa njia ya hoja binafsi, basi kuwepo kwa watu wenye mitazamo tofauti ndani ya chama au serikali leo hii kunapaswa kuangaliwa kama ishara ya kukua kwa demokrasia na uhuru wa maoni.
"Mimi nawashauri sana viongozi wa Chadema wa juu kutafuta nafasi ya kuwasikiliza hawa wanachama wenu. Uongozi bora ni pamoja na kuwa na uwezo wa kutatua changamoto za ndani kwa kuwapa nafasi wenye maoni tofauti na kusikiliza hoja zao," aliandika Olengurumwa.
Aliongeza kuwa Watanzania wengi wanapenda kuona utulivu ndani ya vyama vya siasa kwa kuwa ndio njia pekee ambayo wananchi wanaweza kushiriki katika uongozi wa nchi. Aliwasihi viongozi waandamizi wa CHADEMA, akiwemo Tundu Lissu, Godbless Lema, Halima Mdee (ambaye alikuwa sehemu ya G-55 ya CHADEMA), na John Mnyika, kutafuta njia ya kukaa pamoja na wanachama wa G-55. Alitoa pia ofa ya kusaidia katika majadiliano hayo.
Zaidi ya hayo, Olengurumwa aliwakumbusha wanachama wa CHADEMA kutambua mafanikio waliyopata katika uchaguzi wao wa ndani na kuepuka kuendeleza tofauti zilizojitokeza wakati wa uchaguzi huo. Alisisitiza umuhimu wa kuwa kitu kimoja na kuzika tofauti zao ili kusonga mbele kwa lengo la kuhakikisha uchaguzi mkuu ujao unakuwa huru na wa haki.
Mwisho, Wakili Olengurumwa alihimiza Watanzania kujenga utamaduni wa kuheshimu watu wenye mitazamo tofauti. Alisema kuwa kama ambavyo wanaitaka serikali kuheshimu watu wenye mitazamo tofauti, vivyo hivyo inapaswa kuwa kwa vyama vya siasa. Alishauri uongozi wa CHADEMA kuwaita na kuwasikiliza wanachama wa G-55 na kutoa majibu kwa hoja zao, ikiwa hawana nia nyingine mbaya zaidi ya masuala waliyoyaelezea.