Suala tata la tozo ya kuvuka Daraja la Kigamboni linatarajiwa kuhamia Mahakama Kuu ya Tanzania, baada ya Wakili wa Mahakama hiyo, Mohamed Majaliwa, kutangaza nia ya kufungua Kesi ya Kikatiba kupinga tozo hiyo. Wakili huyo, akisimama kama mwakilishi wa wakazi wa Kigamboni, amesema hatua hii imechukuliwa baada ya majaribio mengi ya kutafuta suluhisho la changamoto hiyo kwa njia za kawaida kukwama.
Akizungumza jijini Dar es Salaam leo, Majaliwa alisisitiza kuwa wanachokifanya ni kwenda kuiomba Mahakama itoe tamko kwamba kitendo cha kuwalazimisha wananchi wa Kigamboni, au mtu yeyote yule, kulipa tozo kila wanapovuka daraja hilo ni kinyume cha Katiba. Amesema mfumo wa sasa ni "mzigo wa kikatili" ambao unawaumiza wakazi wa eneo hilo ambao wanatumia daraja hili kila siku kuelekea shughuli zao za kiuchumi na kijamii.
Hoja kuu ya Wakili Majaliwa inatokana na kile anachokiona kuwa ni ulipaji kodi mara mbili. Amefafanua kuwa utaratibu wa sasa wa kukusanya tozo unakinzana na sheria mama zinazotumika kutoza tozo za barabara, ambazo ni Kanuni ya Tozo za Barabara ya mwaka 1985 (The Road Tolls Fees Regulations, 1985) na Sheria ya Tozo za Barabara na Mafuta (The Road and Fuel Tolls Act).
Kwa mujibu wa Majaliwa, sheria hizo hazielekezi wananchi kulipa kodi ya miundombinu mara mbili. Alibainisha kwamba kwa sasa, kila Mtanzania anayenunua mafuta (dizeli au petroli) tayari anachangia gharama za matengenezo na ujenzi wa barabara kupitia kodi ya mafuta. Hivyo, kumlazimisha mkazi wa Kigamboni kulipa tena tozo kwenye Daraja la Kigamboni kunasababisha kulipa kodi mara mbili kwa matumizi ya miundombinu hiyohiyo.
"Mimi kama mkazi wa Kigamboni, ninaponunua mafuta ya gari langu au nikiingia kwenye daladala, tayari nimechangia matumizi ya barabara. Kisha, nalazimika kulipa tena tozo ya Daraja. Hili haliendani na misingi ya usawa na haki kwa mujibu wa Katiba ya Jamhuri ya Muungano wa Tanzania," alieleza Majaliwa.
Wakili huyo ameongeza kuwa, licha ya serikali kuwa na mikakati mikubwa kama Dira ya Maendeleo ya Miaka 25, bado hakuna hatua zozote za makusudi zilizochukuliwa kupunguza ama kuondoa kabisa tozo hii kwa wakazi wa Kigamboni. Jambo hili linasababisha kero kuongezeka na kuathiri hali ya maisha na biashara za kila siku za wananchi hao. Kufunguliwa kwa kesi hii kunatarajiwa kuamsha mjadala mpana wa kisheria na kijamii kuhusu haki ya wananchi kupata huduma za miundombinu bila kubebeshwa mizigo isiyo ya haki.