Katika kile kinachoonekana kama mwendelezo wa kasi ya "Diplomasia ya Uchumi" iliyoasisiwa na Serikali ya Awamu ya Sita, Waziri wa Mambo ya Nje na Ushirikiano wa Afrika Mashariki, Balozi Mahmoud Kombo, amepiga hodi kwenye viunga vya maamuzi mazito duniani, jijini Washington, D.C., na kufanikiwa kumnasa "samaki mkubwa" wa kisiasa.
Balozi Kombo, ambaye yuko nchini Marekani kwa ziara rasmi ya kikazi yenye lengo la kuimarisha mahusiano ya pande mbili, ameanza kwa kishindo kwa kukutana na Brian Mast, Mwenyekiti wa Kamati ya Mambo ya Nje ya Bunge la Wawakilishi la Marekani (House of Representatives). Mast, ambaye ni Mbunge machachari na mwenye ushawishi mkubwa kutoka Chama cha Republican anayewakilisha Jimbo la Florida, amekubali mwaliko wa kufanya ziara nchini Tanzania mapema iwezekanavyo.
Mgeni Njoo, Mwenyeji Apone
Kukubali kwa Brian Mast kuja Tanzania si jambo dogo kiitifaki wala kisiasa. Marekani ndiyo mshirika mkubwa wa maendeleo wa Tanzania, na wabunge wa aina ya Mast ndio wenye funguo za kupitisha misaada, miradi ya maendeleo kama MCC (Millennium Challenge Corporation), na sheria zinazounga mkono biashara kama AGOA.
Taarifa kutoka Ubalozi wa Tanzania jijini Washington D.C. imethibitisha kuwa mazungumzo hayo hayakuwa ya chai tu, bali yalijaa mikakati mizito. "Wakati akiwa nchini Marekani, Waziri Kombo, mbali na kukutana na Mast, ana ratiba ngumu ya kukutana na vigogo wengine serikalini na wabunge wenye ushawishi ili kuhakikisha Tanzania inabaki kuwa chaguo namba moja la uwekezaji na utalii Afrika Mashariki," ilieleza sehemu ya taarifa hiyo.
Kutoka Florida hadi Serengeti
Mwaliko huu unatazamiwa kufungua milango zaidi ya kibiashara na utalii, ikizingatiwa kuwa Jimbo la Florida, anakotoka Brian Mast, linafanana sana na maeneo ya Pwani ya Tanzania kwa hali ya hewa na utalii wa fukwe. Kitendo cha kiongozi huyo kuja nchini ni fursa ya dhahabu ya kumuonesha vivutio vya utalii, kuanzia Mlima Kilimanjaro, Hifadhi ya Serengeti, hadi fukwe za maraha za Zanzibar, jambo ambalo litaongeza thamani kwenye sekta ya utalii inayochangia pakubwa kwenye pato la taifa.
Hii ni sehemu ya utekelezaji wa vitendo wa agizo la Rais Dkt. Samia Suluhu Hassan la kuhakikisha mabalozi na mawaziri hawaishii kukaa ofisini, bali wanatoka nje "kusaka tonge" kwa ajili ya Watanzania. Diplomasia hii ya uchumi inalenga kuvutia mitaji, teknolojia, na masoko ya bidhaa za Tanzania nchini Marekani.
Ziara Yenye Tija
Waziri Kombo na Mwenyekiti huyo wamekubaliana mambo kadhaa ya msingi yanayolenga kuimarisha udugu wa kihistoria kati ya Dodoma na Washington. Wadau wa mambo ya kidiplomasia wanatafsiri ziara hii kama hatua muhimu ya Tanzania kujiposisheni kimataifa, hasa wakati huu ambapo ushindani wa kuvutia wawekezaji barani Afrika umekuwa mkali.
Inatarajiwa kuwa ziara ya Balozi Kombo itazaa matunda yatakayoonekana hivi karibuni, huku Watanzania wakiendelea kusubiri kuona ni fursa gani mpya zitafunguka kutokana na ushawishi wa vigogo hawa wa Bunge la Marekani.