Spika wa Bunge la Jamhuri ya Muungano wa Tanzania, ambaye pia ni Rais wa Umoja wa Mabunge Duniani (IPU) na Mbunge wa Mbeya Mjini, Dkt. Tulia Ackson, amethibitisha rasmi nia yake ya kuwania kiti cha ubunge katika jimbo jipya la Uyole, lililopo mkoani Mbeya. Hii ni katika kuelekea Uchaguzi Mkuu unaotarajiwa kufanyika Oktoba mwaka huu wa 2025.
Akizungumza Mei 23, 2025, wakati wa Mkutano Mkuu Maalum wa Wilaya ya Chama Cha Mapinduzi (CCM), Dkt. Tulia alieleza kuwa ameamua kuchukua hatua hiyo baada ya kugundua mwendo mdogo wa maendeleo katika eneo hilo. Alisema kuwa hali hiyo inawalazimu wananchi kusubiri kwa muda mrefu ili kupata huduma muhimu wanazostahili.
“Maendeleo ya Uyole yanakwenda polepole sana. Nimeamua kujitolea kwa moyo wangu wote ili kuhakikisha wananchi wa Uyole wanapata huduma wanazostahili na maendeleo ya haraka,” alisema Dkt. Tulia.
Akitumia fursa hiyo kuomba ridhaa ya wanachama wa CCM, Dkt. Tulia aliwahimiza viongozi na wanachama kuchagua kiongozi ambaye atakuwa mtumishi wa kweli wa wananchi na si mtu anayetafuta maslahi yake binafsi.
“Nitoe wito kwenu, watu wengi watakuja kuomba kura zenu, lakini chagueni kiongozi wa kweli. Chagueni mtumishi wa wananchi. Hiyo itasaidia sana kuharakisha maendeleo ya jamii,” aliongeza.
Jimbo la Uyole ni mojawapo ya majimbo mapya yaliyoundwa katika mabadiliko ya mipaka ya kisiasa kwa ajili ya Uchaguzi Mkuu wa mwaka 2025. Inatarajiwa kuwa na ushindani mkubwa kutokana na idadi kubwa ya wakazi na umuhimu wake kiuchumi ndani ya Mkoa wa Mbeya.