Katika kile kinachoonekana kama mwamko mpya na mapinduzi makubwa ndani ya vyombo vya dola, Waziri wa Mambo ya Ndani ya Nchi, Mheshimiwa George Simbachawene, amevunja ukimya na kuweka hadharani 'mzigo' mzito wa maelekezo aliyopewa na Amiri Jeshi Mkuu, Rais Dkt. Samia Suluhu Hassan, juu ya mustakabali wa Jeshi la Polisi nchini.
Akizungumza katika mahojiano maalum ambayo yameibua hisia mpya miongoni mwa wadau wa haki, Waziri Simbachawene amebainisha kuwa serikali imedhamiria kwa dhati kubadilisha falsafa ya jeshi hilo kutoka kuwa chombo cha matumizi ya nguvu (*Police Force*) na kuelekea kuwa chombo cha huduma kwa umma (*Police Service*).
Maagizo Toka Ikulu na Tume ya Jaji Chande
Waziri Simbachawene amesisitiza kuwa mabadiliko haya si ya kubuni au matakwa yake binafsi, bali ni utekelezaji wa maono ya Rais Samia na mapendekezo ya Tume ya Haki Jinai iliyoongozwa na Jaji Mkuu Mstaafu, Mohamed Chande Othman. Tume hiyo iliyoundwa Januari 2023, ilipewa jukumu la 'kufumua' na kuangalia upya mifumo ya taasisi za haki jinai ili kuondoa kero za wananchi ambazo zimekuwa zikipigiwa kelele kwa muda mrefu.
"Hivi ninavyovifanya, wapo wanaodhani ni matakwa yangu, la hasha! Haya ni maelekezo mahususi kutoka kwa Mheshimiwa Rais. Lazima tuhakikishe mahusiano kati ya polisi na wananchi yanarudi kuwa ya karafiki na kuaminiana," alifafanua Simbachawene.
Kutoka 'Kupambana' Kwenda 'Kulinda'
Moja ya maeneo nyeti ambayo Waziri ameyagusia ni mtaala na aina ya mafunzo wanayopewa askari wetu. Amehoji mantiki ya kutoa mafunzo ya "kupambana" na raia badala ya "kuwalinda" raia.
"Mabadiliko ya kimfumo na kiutashi ni lazima. Tunapowafundisha askari wetu, je, tunawaandaa kwenda vitani dhidi ya wananchi au kwenda kuwahudumia? Wenzetu wa Tume ya Haki Jinai wamependekeza tusiwe na *Police Force*, bali tuwe na *Police Service*. Hili ndilo Rais ameagiza tulisimamie kucha na kutwa," aliongeza Waziri huyo kwa mkazo.
Kilio cha Mahusiano Mabovu
Simbachawene hakusita kugusia uhalisia mchungu wa uhasama uliopo kati ya raia na polisi mitaani. Alieleza masikitiko yake kuona baadhi ya wananchi wakishangilia pale askari polisi anapopata matatizo au ajali, jambo ambalo ni ishara mbaya ya kupotea kwa upendo na uaminifu.
Alisema lengo la mageuzi haya ni kufuta taswira hiyo hasi na kujenga jeshi ambalo mwananchi atalikimbilia kwa usalama na si kulikimbia kwa hofu ya kubambikiwa kesi au kunyanyaswa.
Utulivu wa Nchi na "Watia Utambi"
Akigusia suala la amani na utulivu, Simbachawene aliwataka Watanzania kutunza tunu ya amani waliyonayo, akifananisha Tanzania na nyumba pekee ambayo ndugu na jamaa wapo. Alitoa onyo kali kwa wale wenye tabia ya "kutia utambi"—msamiati wa mtaani unaomaanisha kuchochea vurugu au mifarakano—akisema kuwa majuto yake ni makubwa endapo amani itatoweka.
"Hata uwe na rafiki nje ya nchi anayekupenda vipi, Tanzania ndio kwenu. Huku ndiko waliko watoto wako na ndugu zako. Ipo siku utahitaji utulivu wa nchi hii, hivyo usishiriki kubomoa kwa maneno ya kuchochea," alihitimisha kwa kutoa rai ya kizalendo.
Mabadiliko haya yanayotarajiwa ni sehemu ya mkakati mpana wa Rais Samia wa 4R (Reconciliation, Resiliency, Reforms, Reconstruction) ambapo mageuzi katika sekta ya sheria na usalama yamepewa kipaumbele cha juu ili kukuza demokrasia na haki nchini.