Hatimaye wakazi wa Kata ya Malunga katika Manispaa ya Kahama, Mkoa wa Shinyanga, wamepata ahueni baada ya serikali kutoa suluhu ya kudumu kwenye mzozo wa ardhi uliodumu kwa zaidi ya muongo mmoja. Mgogoro huu uliwahusisha wananchi waliokuwa wakiishi katika eneo linalomilikiwa na Chuo cha Maendeleo ya Wananchi (FDC) cha Mwanza, na kuacha familia nyingi zikiishi kwa wasiwasi bila kuwa na uhakika wa milki zao.
Suluhu hiyo imetangazwa na Waziri wa Ardhi, Nyumba na Maendeleo ya Makazi, Deogratius Ndejembi, ambaye alitoa maelekezo ya moja kwa moja kwa njia ya simu kupitia kwa Mkuu wa Mkoa wa Shinyanga, Mboni Mhita, alipokuwa akizungumza na wananchi hao. Waziri Ndejembi alihakikishia kuwa serikali itawatambua na kuwamilikisha rasmi maeneo yao wale wote waliosahaulika wakati wa maamuzi ya awali yaliyofanywa na Hayati Rais Dk. John Magufuli mwaka 2021.
Chanzo cha mgogoro huu ni uvamizi wa takriban hekari 360 za chuo hicho. Hata hivyo, mwaka 2021, uamuzi ulifikiwa wa kutenga hekari 40 kwa ajili ya wananchi waliokuwepo. Bahati mbaya, baadhi ya wakazi halali ndani ya eneo hilo walisahaulika, jambo lililowafanya washindwe kuendeleza maeneo yao kisheria na kuishi kwa hofu ya kubomolewa.
Waziri Ndejembi alisisitiza kuwa, "Serikali ya Awamu ya Sita inayoongozwa na Dk. Samia Suluhu Hassan ni sikivu na haipendi kuona wananchi wakipata shida kutokana na migogoro inayoweza kutatuliwa. Tuta watuma wataalamu wakiongozwa na Kamishna wa Ardhi kuja kuwabaini walengwa halisi ili wamilikishwe. Hata hivyo, zoezi hili halitawahusisha wale walioingia kwenye eneo hili baada ya maamuzi ya mwaka 2021 kufanyika."
Kwa upande wake, Mkuu wa Mkoa wa Shinyanga, Mboni Mhita, alieleza kuwa amekuwa akifuatilia kwa karibu suala hili tangu alipokuwa Mkuu wa Wilaya ya Kahama na amefarijika kuona mwanga umepatikana. Aliwataka wananchi husika kuwa watulivu na kujiandaa na zoezi la utambuzi ili waweze kuendeleza maeneo yao bila wasiwasi.
Wakizungumza kwa furaha, baadhi ya wahanga walionyesha shukrani zao za dhati. Mzee Gregoli Kachemba, aliyenunua eneo lake mwaka 2014, alisema alikuwa amekata tamaa baada ya kuwekeza fedha zake za kustaafu bila matumaini. Naye Paul Andrew, mkazi wa eneo hilo tangu 2009, alieleza jinsi alivyokuwa akiishi kwa hofu baada ya kuambiwa yeye ni miongoni mwa wavamizi, licha ya kununua eneo hilo kihalali. Uamuzi huu umerejesha tabasamu na matumaini mapya kwa wakazi hawa.