Rais Samia Suluhu Hassan ametoa wito kwa nchi za Afrika kuimarisha umoja, mshikamano, na ushirikiano kati ya serikali zao ili kukabiliana na changamoto zinazozikabili bara hilo. Aidha, amempongeza Rais mpya wa Namibia, Netumbo Nandi-Ndaitwah, kwa kuwa Rais wa pili mwanamke barani Afrika aliye madarakani.
Rais Samia alitoa ushauri huo jijini Windhoek, Namibia, alipokuwa akihutubia katika hafla ya kuapishwa kwa Rais Ndaitwah, ambapo alikuwa mgeni rasmi. Alieleza kuwa Afrika inakabiliwa na changamoto nyingi, ikiwemo umaskini uliokithiri, njaa, na ukosefu wa usalama. Alisisitiza kuwa mshikamano ndio msingi wa kufanikiwa katika kukabiliana na changamoto hizo.
"Kwa mtazamo wangu, mshikamano maana yake ni kuimarisha uhusiano na kudumisha ushirikiano wa karibu kati ya serikali zetu. Kama Waafrika, lazima tusimame imara kulindana kama ndugu na kuwa walinzi wa kila mmoja wetu," alisema Rais Samia.
Changamoto zingine ambazo Rais Samia alizitaja na kusema nchi za Afrika zinapaswa kuzikabili kwa umoja ni pamoja na ukosefu wa uwiano wa kibiashara, ukosefu wa usalama, na madeni. Aliongeza kuwa uchumi wa Afrika umelemewa na madeni, huku idadi ya watu ikiongezeka na mifumo ya ikolojia ikizidi kupungua. Pia, alionyesha wasiwasi kuhusu usalama wa mipaka na kupungua kwa dhana ya ujirani mwema kutokana na kuongezeka kwa migogoro ya ndani.
Rais Samia alisisitiza umuhimu wa kuhakikisha kuna ukuaji wa uchumi jumuishi na kufanya juhudi za kufanikisha malengo ya maendeleo endelevu ili kujenga Afrika inayotakiwa. Akimzungumzia Rais Ndaitwah, alimpongeza kwa kuandika historia na kuongeza hadhi ya mtoto wa kike nchini Namibia na Afrika kwa ujumla. Alisema ushindi wake ni fahari kwa Afrika na Watanzania.
"Tanzania unatambulika kama Mama Swapo, jina ulilopewa na Baba wa Taifa letu, Mwalimu Julius Nyerere. Watanzania tuna furaha kuona binti tuliyemlea kwa upendo, sasa ameshika ofisi ya juu kabisa ya uongozi katika nchi hii," alisema Rais Samia.
Aliongeza kuwa Tanzania na Namibia zimekuwa zikifanya kazi kwa karibu katika maeneo yote ya maendeleo na kudumisha mshikamano kupitia Jumuiya ya Maendeleo Kusini mwa Afrika (SADC), Umoja wa Afrika (AU), na Umoja wa Mataifa (UN). Alisisitiza kuwa mshikamano huo utaendelea kudumishwa.
Rais Samia alieleza kuwa tukio hilo la kuapishwa linapaswa kuwa ukumbusho wa nguvu iliyotumika na waasisi wa mataifa hayo mawili katika kupambania haki na usawa. Rais Ndaitwah, aliyekuwa Makamu wa Rais wa Namibia, alishinda uchaguzi kwa zaidi ya asilimia 57 katika uchaguzi uliofanyika Novemba mwaka jana. Rais mstaafu Nangolo Mbumba (83) alimkabidhi madaraka Nandi-Ndaitwah katika hafla hiyo iliyosherehekewa kwa kuadhimisha miaka 35 ya Uhuru wa Namibia.
Katika hotuba yake baada ya kiapo, Nandi-Ndaitwah alikiri kuwa kuchaguliwa kwake kunaingia katika historia ya Namibia, huku akisisitiza kuwa wananchi wamemchagua kwa sababu ya uwezo na sifa zake. Aliongeza kuwa ingawa nchi hiyo imepiga hatua tangu uhuru, bado kuna mengi ya kufanya, ikiwemo suala la ajira.