Wakati Tanzania ikielekea katika Uchaguzi Mkuu wa kihistoria tarehe 29 Oktoba, 2025, kauli nzito na yenye ukakasi imetolewa na Rais wa Shirikisho la Vyama vya Wachimbaji Madini Nchini (FEMATA), John Bina, ambaye amemtaka hadharani mgombea urais wa CCM, Dk. Samia Suluhu Hassan, kutowaonea huruma watu wote wanaodaiwa kupanga njama za kufanya maandamano na kuvuruga amani siku ya kupiga kura.
Akizungumza kwa hisia kali mbele ya umati wa wananchi mkoani Geita leo, Oktoba 13, 2025, wakati wa mkutano wa kampeni wa Dk. Samia, Bina alisema usalama wa Watanzania zaidi ya milioni 60 haupaswi kuwekwa rehani kwa maslahi ya watu wachache. Alieleza kuwa kuna kundi la watu, hasa katika mitandao ya kijamii, wanaoendesha propaganda za chuki na kuhamasisha vurugu, jambo ambalo linaweza kuwasha moto wa machafuko nchini.
"Tunaona jinsi watu wanavyojitokeza kwenye mitandao, wengine wanajirekodi wakiwa wamejifungia kwenye magari yao ya kifahari wakihamasisha fujo. Wanataka kuandamana ili iweje?" alihoji Bina kwa ukali. Aliongeza kuwa, "Kwa maslahi ya taifa, watu hawa wasihurumiwe. Ikibidi wachukuliwe hatua kali. Hivi nchi hii ikinuka, sisi wanyonge tutakimbilia wapi?"
Kauli ya kiongozi huyo wa wachimbaji madini imezua gumzo, ikija wakati ambapo viongozi mbalimbali wa kisiasa, kidini, na kijamii kote nchini wamekuwa wakisisitiza umuhimu wa kudumisha amani, utulivu, na mshikamano wa kitaifa katika kipindi hiki muhimu cha mpito wa kidemokrasia. Wito mkuu unaendelea kuwa kwa wananchi kujitokeza kwa wingi kupiga kura kwa amani na kurejea nyumbani kusubiri matokeo.