Wakati Tanzania ikijiandaa kwa Uchaguzi Mkuu wa mwaka huu, kumekuwa na vuta nikuvute kati ya Serikali na Asasi za Kiraia (AZAKI) mkoani Pwani, huku serikali ikizionya asasi hizo kutojihusisha na siasa na kuepuka kuzua taharuki, huku AZAKI zikilalamikia kubanwa na kuzuiwa kushiriki kikamilifu katika shughuli za maendeleo.
Mvutano huo uliwekwa wazi katika kikao kazi cha Mtandao wa Mashirika Yasiyo ya Kiserikali (NaCONGo) mkoani Pwani, ambapo Kaimu Katibu Tawala wa Mkoa, Nsajigwa George, alitoa onyo kali kwa AZAKI. Alisema katika kipindi hiki cha kuelekea uchaguzi, ni muhimu kwa asasi hizo kufanya kazi zao za kutoa elimu ya uraia kwa kufuata sheria na miongozo iliyopo.
"Serikali haitasita kuchukua hatua kwa asasi yoyote ambayo itaonekana kwenda kinyume na kusababisha taharuki miongoni mwa wananchi. Fanyeni kazi zenu kwa kuzingatia sheria, na epukeni kuwa sehemu ya migawanyiko ya kisiasa," alisisitiza George.
Hata hivyo, upande wa AZAKI, kupitia kwa Mjumbe wa Baraza Kuu la NaCONGo mkoani humo, Prisca Ngweshemi, ulieleza kuwa unakumbana na changamoto kubwa kutoka kwa baadhi ya halmashauri. Alisema asasi nyingi zinanyimwa fursa ya kushiriki katika vikao muhimu vya maendeleo vya halmashauri, huku zikikumbana na urasimu na kucheleweshewa vibali vya utekelezaji wa miradi yao.
"Tunapopeleka barua za kuomba kufanya mradi na jamii, tunapigwa danadana nyingi kupata vibali. Tunabaguliwa kwenye vikao vya ushauri vya halmashauri, jambo linalotukatisha tamaa wakati sisi sote ni wadau wa maendeleo," alisema Prisca.
Katika hali inayoibua maswali, Kaimu Katibu Tawala alifichua kuwa kati ya AZAKI 364 zilizosajiliwa mkoani Pwani, ni 108 tu ndizo zinazofanya kazi, ikiwa ni sawa na asilimia 29.6 tu. Alisema serikali inafuatilia kujua sababu za asasi nyingi kutofanya kazi.
Kufuatia malalamiko hayo, Nsajigwa George aliwaagiza viongozi wa halmashauri kutoa ushirikiano kwa AZAKI na kuzishirikisha kwenye vikao vyao. Naye Ofisa Mkuu kutoka Ofisi ya Msajili wa Mashirika Yasiyo ya Kiserikali, Charles Komba, alisisitiza umuhimu wa kujenga uaminifu na mahusiano mema kati ya pande hizi mbili ili kufikia lengo la kuwahudumia wananchi.