Katika hatua mpya ya kukabiliana na wimbi la uhalifu mtandaoni, Jeshi la Polisi nchini Tanzania limetoa onyo kali kwa watu wote wanaotumia mitandao ya kijamii kama jukwaa la kuchapisha na kusambaza maudhui yenye lengo la kuhamasisha vitendo vya uhalifu. Mamlaka hiyo imesisitiza kuwa haitasita kuwachukulia hatua kali za kisheria wale wote watakaobainika kujihusisha na vitendo hivyo vinavyovuruga amani na usalama wa raia.
Akizungumza kwa niaba ya jeshi hilo, Msemaji Mkuu, DCP David Misime, alibainisha kuwa kumekuwa na ongezeko la watu wenye nia ovu wanaotumia nafasi ya kidijitali kueneza picha, video, na maandishi yanayochochea uhalifu. Alisema maudhui hayo yamekuwa yakisababisha taharuki na hofu isiyo ya lazima miongoni mwa wananchi wanaotumia mitandao kwa malengo mema na maendeleo.
“Jeshi la Polisi linawafahamisha Watanzania wote kwamba linafuatilia kwa ukaribu na linafanya uchunguzi wa kina dhidi ya watu binafsi na makundi yanayohusika na uandaaji na usambazaji wa maudhui haya haramu," alisema DCP Misime. Aliongeza kuwa tayari baadhi ya watuhumiwa wameshatiwa mbaroni na watafikishwa mbele ya vyombo vya sheria ili kujibu tuhuma zinazowakabili, ikiwa ni fundisho kwa wengine wenye tabia kama hiyo.
DCP Misime alitoa wito kwa wahusika kuacha mara moja vitendo hivyo, akionya kuwa mkono mrefu wa sheria utawafikia popote walipo. Alisisitiza kuwa ukimya wa mamlaka usitafsiriwe kama udhaifu, bali ni muda unaotumiwa kukusanya ushahidi thabiti ili kuhakikisha haki inatendeka ipasavyo. “Kwa wale ambao bado hawajakamatwa, wasidhani wamesahaulika. Taratibu za kisheria zinakamilishwa, na wakati wowote kuanzia sasa, watakabiliwa na sheria kulingana na ushahidi uliopo,” ilieleza taarifa ya jeshi hilo.
Kitendo hiki cha polisi kinakuja kama sehemu ya utekelezaji wa Sheria ya Makosa ya Mtandao, inayolenga kudhibiti matumizi mabaya ya teknolojia na kuhakikisha usalama wa kidijitali kwa wote.