Waziri wa Maji, Jumaa Aweso, amewapa habari njema wakazi wa mikoa ya Dar es Salaam na Pwani, akiwahakikishia upatikanaji wa huduma ya maji safi na salama baada ya kuridhishwa na hali ya uzalishaji katika mtambo wa Ruvu Juu. Ziara yake imefuatia maboresho makubwa yaliyofanywa na Mamlaka ya Majisafi na Usafi wa Mazingira Dar es Salaam (DAWASA) kufuatia maagizo aliyoyatoa awali.
Akizungumza baada ya kukagua chanzo cha mto na mtambo huo, Waziri Aweso alisema hali sasa ni shwari na hakuna sababu ya wananchi kukosa maji. "Nimekuja kujionea mwenyewe, hali inaridhisha sana. Kazi kubwa imefanyika hapa na kwenye chanzo tumekuta maji yapo ya kutosha kabisa. Nitoe pongezi kwa Menejimenti ya DAWASA," alisema Aweso.
Kufuatia hali hiyo, Waziri Aweso alitoa maagizo mazito kwa DAWASA, akiitaka kuhakikisha maji hayo mengi yanawafikia wananchi wote bila kikwazo chochote. "Sasa ni wajibu wenu DAWASA kuhakikisha maji haya yanafika kwa wananchi. Wizara itaendelea kuwapa ushirikiano, na kwa kuongezea, Serikali tayari imeagiza pampu mpya za kisasa kwa ajili ya mtambo huu ili ziwe za akiba na kuondoa changamoto ya hitilafu," alisisitiza.
Kauli ya Waziri iliungwa mkono na Katibu Mkuu wa Wizara hiyo, Mhandisi Mwajuma Waziri, aliyeitaka DAWASA kupambana na upotevu wa maji unaosababishwa na mivujo na kuhakikisha malalamiko ya wananchi yanasikilizwa na kutatuliwa kwa haraka.
Katika jitihada za kulinda chanzo cha Mto Ruvu, Mkuu wa Wilaya ya Kibaha, Nickson Simon, alisema wanashirikiana na Bonde la Wami-Ruvu kutafuta vyanzo mbadala vya maji kwa ajili ya mifugo ili kuzuia uharibifu unaofanywa na shughuli za kibinadamu kando ya mto.
Akihitimisha, Kaimu Afisa Mtendaji Mkuu wa DAWASA, Mhandisi Mkama Bwire, aliahidi kutekeleza maagizo hayo na kueleza kuwa katika mwaka wa fedha 2025/2026, mamlaka imejipanga kuunganisha wateja wapya 72,000, ikiwa ni sehemu ya mkakati wa kusambaza huduma kwa wananchi wengi zaidi.