Ndani ya miaka minne, serikali ya awamu ya sita chini ya uongozi wa Rais Dk. Samia Suluhu Hassan imefanya mapinduzi makubwa na ya kimyakimya katika sekta ya elimu, na kuleta unafuu wa kihistoria kwa mamilioni ya familia za Kitanzania. Kupitia uwekezaji mkubwa katika miundombinu, serikali imejenga zaidi ya vyumba vya madarasa 61,000 kwa shule za msingi na sekondari nchi nzima, hatua iliyofuta kabisa changamoto ya wanafunzi waliofaulu kukosa nafasi na kumaliza historia ya "second selection."
Moja ya mageuzi makubwa yaliyotekelezwa ni serikali kuchukua jukumu kamili la ujenzi wa miundombinu ya elimu. Hii imekomesha mfumo wa michango ya lazima, ambao kwa miaka mingi ulikuwa mzigo mzito kwa wazazi na walezi, na mara nyingi ulisababisha msuguano kati ya wananchi na serikali za mitaa kupitia "kamatakamata" za michango. Sasa, wazazi wanaweza kupeleka watoto wao shule bila hofu ya kudaiwa michango ya ujenzi, jambo lililoongeza idadi ya wanafunzi shuleni kutoka milioni 14.9 mwaka 2020 hadi zaidi ya milioni 16.1 mwaka 2024.
Mafanikio haya ya miundombinu yameenda sambamba na dhamira ya kuhakikisha elimu inakuwa jumuishi. Katika ujenzi mpya, madarasa 26,905 ya shule za msingi na 34,124 ya sekondari yamejengwa kwa kuzingatia mahitaji ya wanafunzi wenye ulemavu, kukiwa na njia maalum na vyoo vinavyowarahisishia kutembea. Serikali pia imeajiri walimu wenye utaalamu wa elimu maalum na kuanzisha kozi za diploma za elimu maalum zinazofadhiliwa kikamilifu katika vyuo vya ualimu.
Katika ngazi ya elimu ya juu, serikali imeongeza uwazi katika utoaji wa mikopo kupitia Bodi ya Mikopo ya Wanafunzi wa Elimu ya Juu (HESLB), huku wanafunzi kutoka familia duni wakipewa kipaumbele. Ili kuthibitisha hili, bajeti ya mikopo kwa mwaka 2025 imefikia kiasi cha kihistoria cha Shilingi bilioni 900, kiasi ambacho hakijawahi kutolewa. Aidha, mpango wa elimu bila ada kuanzia chekechea hadi kidato cha sita umeimarishwa kwa bajeti yake kuongezwa kutoka Shilingi bilioni 312 hadi bilioni 796 katika miaka minne.
Mafanikio haya yote yanatokana na uongozi thabiti wa Rais Samia katika kuimarisha ukusanyaji wa mapato ya ndani na kutumia diplomasia yake kupata misaada na mikopo nafuu kutoka kwa washirika wa maendeleo. Hii imemfanya kwa hakika astahili sifa ya "Mama wa elimu kwa wote," kwani amebadilisha elimu kutoka kuwa ndoto na kuifanya kuwa fursa halisi kwa kila mtoto wa Kitanzania.