Mgombea urais kupitia Chama cha Sauti ya Umma (SAU), Majalio Kyara, ameendelea na kampeni zake kwa kishindo, akitua katika Stendi Kuu ya Mabasi ya Shinyanga ambapo alinadi sera za chama chake akiahidi kuleta "ukombozi wa maendeleo" kwa wananchi. Mbele ya umati uliojitokeza kumsikiliza leo, Oktoba Mosi, 2025, Kyara alizindua ahadi nzito zinazolenga moja kwa moja maisha ya Mtanzania wa kawaida.
Nguzo kuu ya Ilani ya SAU, kama alivyoeleza Kyara, ni mpango kabambe wa kuzalisha ajira milioni 10 kwa vijana na Watanzania wote. Alisema serikali yake itafungua fursa za kiuchumi zitakazowezesha kufikiwa kwa lengo hilo, akitaja kuwa ni aibu kwa nchi yenye rasilimali nyingi kuwa na idadi kubwa ya watu wasio na ajira.
Akiwalenga moja kwa moja wafugaji wa Mkoa wa Shinyanga na maeneo jirani, Kyara aliahidi kumaliza kero ya kusafirisha mifugo hai kwenda Dar es Salaam kwa ajili ya kuchinja. Alisema serikali yake itajenga machinjio ya kisasa katika kila mkoa na wilaya ili kuongeza thamani ya mifugo, kuzalisha ajira za wenyeji na kuhakikisha mapato yanabaki katika ngazi ya jamii.
"Hakuna tena kero ya kusafirisha ng'ombe mamia ya kilomita. Tutajenga machinjio hapa hapa, nyama itasindikwa na thamani yake itaongezeka. Hii ndiyo maendeleo ya kweli tunayowaletea," alisema Kyara.
Aidha, aligusia suala la gharama za maisha kwa kuahidi kushusha bei ya mafuta nchini. Alifafanua kuwa hatua hiyo itakuwa na athari chanya kwa sekta zote, ikiwemo kurahisisha usafirishaji wa bidhaa na kuwawezesha wakulima kupeleka mazao yao sokoni kwa gharama nafuu, jambo litakaloongeza faida yao.
Kyara alihitimisha kwa kuwaomba wananchi wa Shinyanga wasifanye makosa ifikapo siku ya uchaguzi mkuu, Oktoba 29. Aliwasihi wampigie kura za kishindo yeye pamoja na wagombea wote wa ubunge na udiwani wa SAU ili kumpa timu imara ya kutekeleza ahadi hizo na kuleta mabadiliko ya kweli nchini.