Wakati Tanzania ikijiandaa kwa Uchaguzi Mkuu uliopangwa kufanyika Oktoba 2025, Tume Huru ya Taifa ya Uchaguzi (INEC) imetoa maagizo thabiti kwa watendaji wake nchi nzima, ikisisitiza umuhimu wa kufanya kazi kwa weledi, uwazi na uadilifu ili kuhakikisha uchaguzi huru na wa haki.
Akifungua mafunzo kwa watendaji wa uchaguzi mkoani Shinyanga jana, Julai 21, 2025, Mwenyekiti wa Tume, Jaji Jacobs Mwambegele, alitaja maeneo makuu ya kuzingatia. Alisisitiza vikali suala la uwazi kwa vyama vya siasa, akielekeza kwamba ni lazima vyama vipewe taarifa mapema kuhusu utaratibu wa kuwaapisha mawakala wao. "Toeni taarifa mapema kwa vyama vya siasa kwa mujibu wa sheria... na kuvipatia orodha ya vituo vya kupigia kura ili kuviwezesha kupanga mawakala," Jaji Mwambegele aliamuru, akilenga kuondoa malalamiko ya kunyimwa habari.
Aidha, alielekeza kuhusu umakini katika usimamizi wa vifaa vya uchaguzi, akitaka vihakikiwe na kusambazwa mapema kwenye vituo vyote ili kuhakikisha kila kituo kinafunguliwa ifikapo saa 1:00 kamili asubuhi siku ya uchaguzi.
Ujumbe kama huo wa kusimamia uadilifu ulitolewa Kisiwani Pemba na Makamu Mwenyekiti wa Tume, Jaji Mstaafu Mbarouk Salim Mbarouk. Katika hotuba yake, Jaji Mbarouk alitoa onyo kali dhidi ya upendeleo na ajira zisizo za haki kwa wasimamizi wa vituo. “Ajira za watendaji wa vituo zizingatie kuajiri watendaji wenye weledi, wanaojitambua, wazalendo, waadilifu na wachapakazi na kuachana na upendeleo kwa ndugu na jamaa ambao hawana sifa," alisisitiza Jaji Mbarouk.
Viongozi hao wa Tume wamewataka watendaji hao kufanya kazi kwa kuzingatia Katiba, sheria na kanuni ili kuepuka kuwa chanzo cha lawama au migogoro na wadau wengine wa uchaguzi. Walikumbushwa wajibu wao wa kushirikisha wadau wote pale inapobidi na kutambua mahitaji ya vituo vya kupigia kura mapema.
Mafunzo haya ya siku tatu, ambayo yanawahusisha waratibu, wasimamizi na wasimamizi wasaidizi wa uchaguzi, yanafanyika nchi nzima kwa awamu mbili. Awamu ya pili inayoendelea sasa inajumuisha mikoa kama Shinyanga, Mwanza, Dar es Salaam, Pwani, Arusha na Pemba, ikiwa ni muendelezo wa awamu ya kwanza iliyokamilika Julai 17 na kuhusisha mikoa mingine kama Dodoma, Morogoro, Mtwara na Unguja.