Tume ya Kurekebisha Sheria Tanzania (LRCT) imeanzisha mchakato mpana wa kupitia na kufumua upya sheria kadhaa muhimu nchini, ikiwa na malengo makuu mawili: kulinda jamii dhidi ya mmomonyoko wa maadili na kuimarisha mazingira ya biashara na uchumi.
Akizungumza hivi karibuni, Katibu Mtendaji wa LRCT, George Mandepo, alisema Tume imeanza rasmi mapitio ya sheria zinazohusu matumizi ya tumbaku na shisha, kutokana na wasiwasi mkubwa kuhusu ongezeko la matumizi ya shisha miongoni mwa vijana.
"Uvutaji wa shisha umeshtua. Vijana wengi wanavutwa na matumizi haya, jambo linaloathiri afya zao, linapunguza tija kazini, na kuchochea tabia zisizofaa. Ni lazima sheria zetu ziendane na wakati ili kukabiliana na hili," alisema Mandepo.
Katika eneo la kulinda jamii, Mandepo aliongeza kuwa Tume inafanyia kazi pia sheria za michezo ya kubahatisha (kamari) ili kuwalinda watoto wanaotoroka masomo na kujiingiza kwenye michezo hiyo, pamoja na kuandaa mpango wa kupitia sheria za ardhi ili kupunguza migogoro inayoendelea nchini.
Wakati huohuo, Tume inafanya mapitio ya sheria za kiuchumi ili kurahisisha ufanyaji biashara na kuvutia wawekezaji. Mkuu wa Sehemu ya Mapitio ya Sheria, Christina Binal, alitaja baadhi ya sheria zinazofanyiwa kazi kuwa ni pamoja na Sheria ya Kampuni, Sheria ya Majina ya Biashara, Sheria ya Takwimu, na Sheria ya Usuluhishi, zote zikilenga kuleta ufanisi na tija kiuchumi.
Katika muktadha wa haki za familia, Mkuu wa Sehemu ya Udhibiti Ubora, Saada Bushiri, alisisitiza kuwa mapitio ya sheria yataendelea kulinda haki za wanandoa, akitolea mfano Sheria ya Ndoa ambayo inatambua mchango wa mama wa nyumbani na kumpa haki ya kugawana mali zilizochumwa wakati wa ndoa.
Tume pia inaendelea kutoa elimu kwa umma kupitia kampeni ya 'Msaada wa Kisheria ya Mama Samia,' ambayo imefanikiwa kuwafikia zaidi ya wananchi milioni tano hadi sasa.