Katika kile kinachoonekana kama mkakati wa kutikisa siasa za Tanzania, mgombea urais kupitia Chama cha Makini, Coster Kibonde, ametia kishindo katika uzinduzi wa kampeni zake kwa kutoa ahadi lukuki, ikiwemo ile ya kipekee ya kuunda serikali ya umoja wa kitaifa endapo atashinda uchaguzi mkuu ujao. Kibonde alikwenda mbali zaidi kwa kutangaza kuwa, katika serikali hiyo, mpinzani wake mkuu, Dk. Samia Suluhu Hassan, atakuwa miongoni mwa watu wa kwanza kupewa wadhifa wa juu.
Akihutubia maelfu ya wafuasi wake katika viwanja vya Manzese jijini Dar es Salaam, Kibonde alisema lengo lake si kulipiza visasi, bali ni kuleta maendeleo kwa kuunganisha nguvu za viongozi wote mahiri nchini. "Mimi si mgombea wa visasi, bali mshindani wa maendeleo. Nitaunda serikali ya umoja, na mtu wa kwanza kumteua atakuwa Dk. Samia kutokana na umahiri wake kwenye diplomasia ya siasa na uchumi," alisema Kibonde.
Mbali na ahadi hiyo ya maridhiano ya kisiasa, Kibonde alimwaga sera kabambe zinazolenga kumgusa kila Mtanzania. Katika sekta ya elimu, aliahidi kufuta ada kuanzia ngazi ya chekechea hadi chuo kikuu, akisisitiza kuwa elimu ni haki ya msingi na si anasa. "Hakuna mtoto wa Kitanzania atakayekosa fursa ya kusoma kwa sababu ya umaskini wa wazazi wake chini ya uongozi wangu," aliahidi.
Kwa upande wa vijana na ajira, alitangaza mpango wa kumpatia kila kijana eka tano za ardhi yenye hati miliki ili zitumike kama dhamana ya kupata mikopo kwa ajili ya kilimo na ujasiriamali. Aliongeza kuwa serikali yake itajenga viwanda vya kuchakata mazao katika kila kanda na kuwasomesha vijana nje ya nchi katika fani maalum, kisha kuwapa ajira za moja kwa moja pindi watakaporejea.
Katika sekta ya afya, ahadi yake ilikuwa ni kujenga hospitali yenye vifaa vya kisasa na madaktari wa kutosha katika kila kata nchini, ili kusogeza huduma muhimu karibu na wananchi.
Naye mgombea mwenza wake, Azza Haji Suleiman, alitumia fursa hiyo kuwasihi Watanzania, hasa vijana, kudumisha amani na kuepuka ghasia katika kipindi chote cha uchaguzi, akisisitiza kuwa amani ndio urithi mkuu wa taifa. Kibonde alihitimisha kwa kuwataka wananchi kufanya uamuzi sahihi Oktoba 29 ili kufungua ukurasa mpya wa maendeleo kwa wote.