Kuelekea Uchaguzi Mkuu wa leo, Kamati ya Amani Mkoa wa Pwani imetoa wito mzito kwa wananchi kulinda amani na utulivu uliopo, huku ikionya kwamba hakuna sehemu ya kukimbilia endapo utulivu wa nchi utavurugika.
Mwenyekiti Mwenza wa kamati hiyo, Ndugu Julius Shemkai, akizungumza leo mjini Kibaha, alisisitiza kuwa upigaji kura ni haki ya msingi ya kila Mtanzania, na hivyo mtu mwingine hana mamlaka ya kumzuia yeyote anayetaka kutimiza haki hiyo.
"Tunawahimiza wananchi wajitokeze kwa wingi kwenda kupiga kura, kwa wale waliojiandikisha, kwa kufuata maelekezo ya wasimamizi wa vituo vya kupigia kura kwa utulivu na amani. Wananchi wasipoteze fursa hii muhimu," alisema Shemkai. Alisisitiza kuwa kila mpiga kura anatakiwa kupiga kura kisha kurejea nyumbani kuendelea na majukumu yake badala ya kuunda mikusanyiko isiyo ya lazima.
Shemkai alibainisha kuwa Kamati ya Amani inahimiza Watanzania kujiepusha na viashiria vyote vya uvunjifu wa amani, ikiwemo kufanya maandamano, kuharibu vituo vya kupigia kura, na aina nyingine zozote za ghasia.
Kwa upande wa dini, Mwenyekiti Mwenza, Shekhe Khamis Mtupa, alisema Kamati hiyo inavipongeza vyama vyote vya siasa vilivyoshiriki kampeni kwa kufanya kampeni zao kiungwana na kidiplomasia. Shekhe Mtupa alikumbusha Watanzania kuwa kuitunza amani ni takwa la kidini kupitia vitabu vyote vitakatifu, vikiwemo Zaburi, Torati, Injili na Quran.
Shekhe Mtupa aliwaomba wananchi kuwapuuza wanaoleta uchochezi wa kuvuruga uchaguzi ili Tanzania ibaki salama kabla na baada ya uchaguzi. Mwisho, Kamati hiyo imeviasa vyama vya siasa na wagombea kufuata kanuni na taratibu zote za uchaguzi na kukubali matokeo yatakayotangazwa.