Jeshi la Polisi Kanda Maalum ya Dar es Salaam limetoa ufafanuzi kuhusu taarifa zinazosambaa kwenye mitandao ya kijamii, zikidai kuwa mabaki ya viungo vya binadamu yamekutwa katika eneo la Magole Mpiji, Dar es Salaam. Kamanda wa Polisi Kanda Maalum ya Dar es Salaam, Jumanne Muliro, amesisitiza kuwa taarifa hizo si za sasa, bali zinahusu tukio la miaka 11 iliyopita, ambalo lilitolewa ufafanuzi wake rasmi Julai 22, 2014, na aliyekuwa kamanda wa polisi wa kanda wakati huo.
Kamanda Muliro amefafanua kuwa, kufuatia uchunguzi wa kina uliohusisha Jeshi la Polisi, Ofisi ya Mkemia Mkuu wa Serikali, Wizara ya Afya, na mamlaka zingine za kiuchunguzi, jumla ya watu wanne walikamatwa. Waliohusika ni pamoja na madaktari na wataalam kutoka Chuo Kikuu cha Kimataifa cha Tiba na Teknolojia (IMTU), kilichopo Kunduchi, Dar es Salaam.
"Kukamatwa kwao kulitokana na taarifa za wananchi zilizoeleza kwamba katika bonde la Mto Mbezi, eneo la Magole Mpiji Kinondoni, kulikuwa na viungo mbalimbali vya miili ya binadamu vilivyotelekezwa," alisema Kamanda Muliro. Aliongeza kuwa, baada ya uchunguzi wa kina, ilibainika wazi kuwa viungo hivyo vya binadamu vilikuwa vimetolewa kwenye maabara ya mafunzo ya chuo cha IMTU, vilikotumiwa kwa mafunzo kwa vitendo, na kisha kutupwa eneo hilo kinyume kabisa na sheria.
Kamanda Muliro pia amesema kuwa baada ya kukamatwa, wahusika hao, wakiwemo madaktari na wataalam wa chuo hicho, walifikishwa mbele ya Hakimu Mfawidhi wa Mahakama ya Wilaya Kinondoni wa wakati huo, Kwey Rusema. Wakili wa Serikali, Magoma Mtani, aliwasomea mashitaka yanayohusiana na kitendo hicho cha kutupa viungo hivyo kinyume cha sheria.
Kufuatia tukio hili la zamani kurudiwa kusambazwa, Jeshi la Polisi limetoa onyo kali kwa watu wenye tabia ya kusambaza taarifa za uongo. Kamanda Muliro amewatahadharisha wale wenye malengo ya kuzusha taharuki na kujenga hofu kwa umma. "Jeshi la Polisi halitasita kuchukua hatua za kisheria zinazostahiki kulingana na tabia na miendendo ya watu hao," alisisitiza Kamanda Muliro, akionyesha dhamira ya Jeshi la Polisi kudhibiti usambazaji wa habari za uongo zinazoweza kuvuruga amani na utulivu wa jamii.