Hali ya hewa katika viunga vya Silicon Valley nchini Marekani imebadilika ghafla na kuwa ya mawingu mazito kwa upande wa kampuni ya OpenAI, watengenezaji wa mtandao maarufu wa ChatGPT. Katika kile kinachoonekana kama kukiri kuzidiwa kete, Ofisa Mtendaji Mkuu (CEO) wa OpenAI, Sam Altman, amewatumia ujumbe mzito wafanyakazi wake akieleza kuwa kampuni hiyo inakabiliwa na "upepo mbaya wa kiuchumi" kutokana na ujio wa teknolojia mpya ya Google, *Gemini 3*.
Taarifa za ndani zilizopatikana na mtandao wa *The Information* zinaeleza kuwa, katika barua pepe iliyovuja Novemba 20, Altman aliweka wazi hofu yake kuwa Google imepiga hatua kubwa ambayo inaweza kuifanya OpenAI kuonekana kama imepitwa na wakati kwa muda. Hii ni mara ya kwanza kwa vigogo hao wa teknolojia kukiri waziwazi kuwa wapinzani wao wa jadi, Google, wamevunja "mwiko" wa kimahesabu (scaling laws) na kuja na bidhaa ambayo inatishia utawala wa ChatGPT.
"Lazima tukubali ukweli, Google wamecheza karata zao vizuri safari hii. Gemini 3 ina uwezo mkubwa, na ingawa bado tuna nafasi, lazima tukimbie kwa kasi ya ajabu ili kuwafikia na kuwapita," alikaririwa Altman katika ujumbe huo uliozua taharuki.
Inafahamika kuwa mshtuko huo wa OpenAI unatokana na uwezo wa *Gemini 3* katika eneo la uandishi wa kodi za kompyuta (coding), eneo ambalo linaingiza pesa nyingi kwa kampuni hizo kupitia wateja wa kibiashara. Ili kujaribu kuziba ufa huo, OpenAI ililazimika kutoa toleo la dharura la 'GPT-5.1-Codex-Max', lakini inaonekana bado 'gemu' ni ngumu.
Hata hivyo, kama wahenga wasemavyo "mfa maji haachi kutapatapa," Sam Altman hajakata tamaa. Imebainika kuwa OpenAI "wameingia maabara" na wanapika 'kombora' jipya lenye jina la msimbo 'Shallotpeat'. Mfumo huu mpya wa Akili Bandia (AI) unatajwa kuwa ndio silaha ya siri inayotarajiwa kuzinduliwa rasmi au kutangazwa kuelekea Novemba 30, tarehe ambayo ChatGPT itakuwa inatimiza miaka mitatu tangu kuanzishwa kwake.
Dhumuni la 'Shallotpeat' ni kurekebisha makosa yote yaliyojitokeza kwenye matoleo ya awali na kutoa upinzani wa kweli kwa Gemini 3. Altman anataka kuhakikisha kuwa licha ya Google kutamba sasa, bado neno "AI" linaendelea kuwa na maana ya "ChatGPT" katika vichwa vya watu wengi duniani.
Mchuano huu una maana kubwa hata kwa wadau wa teknolojia nchini Tanzania, ambapo matumizi ya AI yameanza kushika kasi katika sekta za elimu, uandishi, na biashara za mtandaoni. Ushindani huu unatarajiwa kushusha gharama na kuongeza ufanisi wa zana hizi ambazo sasa ni sehemu ya maisha ya kila siku.
Altman alihitimisha ujumbe wake kwa kuwataka wafanyakazi wake kutokata tamaa na kuzingatia lengo kuu la kampuni hiyo: Kufikia *Artificial General Intelligence* (AGI) - hatua ambapo kompyuta itakuwa na akili sawa au kuzidi akili ya mwanadamu katika kila nyanja, kuanzia sayansi, tiba, hadi sanaa.
"Huu ni ushindani wa muda mfupi, lakini vita yetu ni ya muda mrefu. Siwezi kukubali nafasi hii ichukuliwe na kampuni nyingine yoyote," alihitimisha Altman kwa msisitizo.