Kampuni ya X, ambayo zamani ilijulikana kama Twitter, na kampuni dada yake ya akili bandia (AI), xAI, zimewafungulia mashtaka Apple na OpenAI katika mahakama ya jimbo la Texas, Marekani. Kampuni hizo mbili, zinazomilikiwa na bilionea Elon Musk, zinazituhumu Apple na OpenAI kwa kufanya "makubaliano haramu" yanayolenga kuzuia ushindani katika soko la teknolojia.
Katika nyaraka za kisheria zilizowasilishwa mahakamani, X na xAI zinadai kuwa Apple na OpenAI zimeungana ili kujilinda na wachezaji wapya. Madai hayo yanajikita kwenye ukweli kwamba Apple, inayotawala soko la simu mahiri, inaingia makubaliano na OpenAI, ambayo inatawala soko la roboti za mazungumzo za AI. Ushirikiano huu, kwa mujibu wa mashtaka, unahakikisha kwamba hakuna kampuni nyingine inayoweza kupata fursa ya kufanya ushindani wa kweli.
Zaidi ya hayo, mashtaka hayo yanadai kwamba Apple imeipa kipaumbele roboti ya mazungumzo ya OpenAI, maarufu kama ChatGPT, na kuweka nyuma roboti zingine zinazoshindana nayo, zikiwemo Grok ya xAI, kwenye duka lake la programu, App Store. Suala hili linaungwa mkono na madai ya awali ya Elon Musk aliyoyatoa kupitia X (Twitter), akisema kuwa Apple hairuhusu kampuni nyingine yoyote ya AI kufikia kilele cha orodha ya App Store isipokuwa OpenAI.
Mzozo kati ya Elon Musk na OpenAI una historia ndefu. Musk, ambaye alikuwa mmoja wa waanzilishi wa OpenAI, alijitenga na kampuni hiyo na tangu wakati huo wamekuwa na mgogoro unaoendelea. Mwaka jana, Musk aliishitaki OpenAI akijaribu kuzuia mabadiliko yake kuwa kampuni ya kibiashara na hata alitoa ofa ya siri ya kuinunua kwa kiasi cha dola bilioni 9.74, lakini ofa hiyo ilikataliwa.
Hadi sasa, Apple haijatoa maoni yake kuhusu mashtaka haya. Hata hivyo, Sam Altman, Mkurugenzi Mtendaji wa OpenAI, alijibu madai ya awali ya Musk kwa kauli kali. Akijibu kwenye chapisho la Musk la mwezi uliopita, Altman alidai kuwa inashangaza kumsikia Musk akitoa madai hayo wakati kuna madai yanayosema yeye hutumia X kuendesha soko kwa manufaa ya kampuni zake na kuwadhuru washindani pamoja na watu anaowachukia.