Serikali imetangaza kuanza mchakato wa kuvunja mikataba na kuchukua hatua kali za kisheria dhidi ya makandarasi wawili, HariCom International Ltd na Trinity Manufacturing Services, kufuatia kutelekeza miradi muhimu ya barabara wilayani Rufiji licha ya kulipwa mamia ya mamilioni ya shilingi kama malipo ya awali.
Kauli hiyo kali imetolewa na Naibu Katibu Mkuu wa TAMISEMI anayesimamia miundombinu, Mhandisi Rogatus Mativila, wakati akikagua miradi hiyo na kubaini ukimya mtupu kwenye maeneo ya ujenzi. Alieleza kusikitishwa na vitendo vya baadhi ya makandarasi wazawa wanaopewa fursa lakini wanachukua fedha za umma na kisha kutoweka, na kuacha wananchi wakiteseka.
Kwa mujibu wa Mhandisi Mativila, kampuni ya HariCom International Ltd ililipwa Shilingi milioni 160 kwa ajili ya kuanza ujenzi wa barabara ya Polisi–Kirungi (km 1) yenye gharama ya jumla ya Shilingi bilioni 1.07, lakini tangu Aprili mwaka jana, hawajafanya kazi yoyote na wametelekeza vifaa vyao eneo la mradi. Vilevile, kampuni ya Trinity ilipokea Shilingi milioni 460 tangu Agosti mwaka jana na mradi wao ulipaswa kukamilika Novemba mwaka huu, lakini hakuna kilichofanyika.
"Huu ni ubadhirifu na dharau kwa wananchi wa Rufiji ambao wamepata shida kubwa kutokana na mafuriko ya hivi karibuni. Serikali haitavumilia hili. Tumeshaagiza vifaa vyao vilivyotelekezwa vishikiliwe na tunasitisha mikataba yao, na hawatapewa kazi yoyote tena kupitia TAMISEMI," alisisitiza Mativila.
Meneja wa TARURA Mkoa wa Pwani, Mhandisi Ibrahimu Kibasa, aliongeza kuwa jitihada za kuwatafuta wakurugenzi wa kampuni hizo kwa njia ya simu zimegonga mwamba kwani hawapokei simu, jambo linaloashiria nia ya kukwepa uwajibikaji. Serikali sasa inajipanga kutafuta njia mbadala za kukamilisha miradi hiyo muhimu kwa wananchi.