Katika hatua ya kihistoria kwa mapambano dhidi ya athari za nishati chafu nchini, Shirika la Viwango Tanzania (TBS) limekabidhiwa rasmi mashine ya kisasa ya kupima kiwango cha hewa chafu inayotolewa na majiko ya kupikia. Kifaa hiki, kilichotolewa na Mfuko wa Maendeleo ya Mitaji wa Umoja wa Mataifa (UNCDF) kupitia mradi wa CookFund, unaofadhiliwa na Umoja wa Ulaya (EU), kinatazamiwa kuwa mkombozi katika kuhakikisha Watanzania wanapata teknolojia salama za kupikia.
Hii ni habari njema inayokuja wakati serikali ikipambana kufikia lengo lake la kuhakikisha asilimia 80 ya kaya zinatumia nishati safi ifikapo mwaka 2034. Kwa muda mrefu, wabunifu na wazalishaji wa ndani walikabiliwa na changamoto ya gharama kubwa za kupima ubora wa majiko yao, jambo lililokwamisha kasi ya uvumbuzi. Sasa, kifaa hiki kitafanya kazi kama "mkaguzi" mkuu, kikichambua kwa usahihi kila gesi au moshi hatari unaotoka kwenye majiko, na hivyo kutoa ithibati kwa yale yanayokidhi viwango vya usalama na ufanisi.
Akitoa neno la serikali katika hafla hiyo muhimu iliyofanyika jijini Dar es Salaam, Katibu Mkuu wa Wizara ya Nishati, Mhandisi Felchesmi Mramba, alieleza kuwa ujio wa kifaa hiki ni mapinduzi. "Hii ni hatua kubwa. Sasa tutaweza kuthibitisha ubora wa majiko yanayotengenezwa na kuingizwa nchini. Hii itawalinda watumiaji, itapunguza gharama kwa wabunifu wetu, na mwisho wa siku itachochea uzalishaji wa wingi wa majiko bora," alisisitiza Mhandisi Mramba.
Umoja wa Ulaya, ambao ni wafadhili wakuu wa mradi huu, umesisitiza dhamira yake ya kuendelea kuiunga mkono Tanzania. Kwa mujibu wa Lamine Diallo, Mkuu wa Rasilimali za Asili kutoka EU, msaada huu unalenga hasa kumwinua mjasiriamali mdogo. "Tunatarajia kifaa hiki kitachochea ubunifu na kuongeza ajira kwa Watanzania kupitia utengenezaji wa majiko. Kupunguza gharama za upimaji kunafungua milango kwa wengi zaidi kuingia kwenye soko," alisema Diallo.
Mafanikio ya mradi wa CookFund tayari yameanza kuonekana, ambapo hadi sasa umetoa ruzuku kwa biashara ndogo na za kati 78, umezisaidia shule 41 kuhamia kwenye nishati safi, na umenufaisha zaidi ya watu milioni 1.7 huku ukitengeneza ajira zaidi ya 11,600.
Kwa upande wake, Mkurugenzi Mkuu wa TBS, Dkt. Ashura Katunzi, alipokea kifaa hicho kwa shukrani kubwa, akisema ni mwanzo wa safari ya kuelekea usanifishaji kamili. "Kuwa na kifaa hiki hapa nchini ni ukombozi. Hata hivyo, mahitaji ni makubwa. Tunaomba msaada zaidi ili huduma hizi muhimu ziwafikie wananchi katika mikoa mingine kama Dodoma, Mbeya na Mwanza," alieleza Dkt. Katunzi.