ChatGPT Sasa ni Mwalimu, Siyo 'Mashine ya Majibu' Tena

Kampuni ya OpenAI, watengenezaji wa mfumo maarufu wa Akili Bandia (AI) wa ChatGPT, imetangaza kuleta mabadiliko makubwa kwa kuanzisha kipengele kipya kinachoitwa 'Njia ya Kujisomea' (Study Mode). Hatua hii inalenga kubadilisha jinsi wanafunzi wanavyotumia zana hii, kutoka kuwa "mashine ya kutoa majibu" na kuwa msaidizi na mwalimu binafsi wa kujifunza.

Tangu kuzinduliwa kwake, ChatGPT imekuwa ikitumiwa na mamilioni ya wanafunzi duniani kote kusaidia katika kazi za shule, kujiandaa na mitihani, na kujifunza mada mpya. Hata hivyo, matumizi haya yamezua swali zito la kimaadili: Je, AI inasaidia kweli mwanafunzi kujifunza, au inamrahisishia tu kupata majibu bila kufikiri?

Katika kujibu swali hili, OpenAI, kwa kushirikiana na walimu, wanasayansi, na wataalamu wa elimu, wamebuni 'Njia ya Kujisomea'. "Tunajua kwamba ChatGPT ikitumiwa kama mwalimu au msaidizi, inaweza kuongeza sana uwezo wa mwanafunzi. Lakini ikitumiwa kama mashine ya majibu tu, inaweza kuzuia ujifunzaji," alisema Leah Belsky, Makamu wa Rais wa Elimu katika OpenAI.

'Njia ya Kujisomea' Inafanyaje Kazi?

Badala ya kutoa jibu la mwisho moja kwa moja, kipengele hiki kipya hufanya kazi kama mwalimu mvumilivu:

1. Hukuongoza kwa Maswali: Badala ya kukupa jibu, kitakuuliza maswali yanayokuchochea kufikiri na kukuongoza hatua kwa hatua hadi upate jibu mwenyewe.
2. Huvunja Mada Ngumu: Huchukua mada ngumu na kuigawanya katika sehemu ndogo na rahisi kueleweka, na kukuelekeza kila hatua.
3. Inajirekebisha Kulingana na Wewe: Inatumia historia ya mazungumzo yenu na maswali ya tathmini ili kutambua kiwango chako cha uelewa na kurekebisha msaada wake kulingana na mahitaji yako.
4. Inakupima na Kukupa Maoni: Inatumia maswali ya haraka (quizzes) ili kupima ulichojifunza na kutoa maoni yanayokusaidia kuelewa vizuri zaidi na kuimarisha uwezo wako.

Lengo ni kufanya mchakato wa kujifunza wenyewe kuwa wa kuvutia zaidi na kumfanya mwanafunzi atumie akili yake kikamilifu. Kipengele hiki kimeanza kupatikana kwa watumiaji wote wa ChatGPT, wakiwemo wanaotumia toleo la bure na wale wanaolipia, kuanzia tarehe 29 Julai.

OpenAI imekiri kuwa hiki ni hatua ya kwanza na huenda kukawa na makosa au mapungufu, lakini wanaendelea kuiboresha. Mipango ya baadaye ni pamoja na kuongeza picha na video kusaidia kuelezea mada ngumu, na kumruhusu mtumiaji kuweka malengo yake ya kujifunza na kufuatilia maendeleo.

Mtazamo huu unaendana na kauli ya Mkurugenzi Mtendaji wa OpenAI, Sam Altman, ambaye hivi karibuni alisema anaamini AI itabadilisha mustakabali wa elimu kwa kiasi kikubwa. Altman, ambaye aliacha masomo katika Chuo Kikuu cha Stanford, alidokeza kuwa huenda watoto wake "wasihudhurie chuo kikuu" kwa sababu anaamini mfumo wa vyuo vikuu hautakuwa na ufanisi kama ilivyo sasa katika miaka 18 ijayo.