Huku dunia ikiwa bado inaugulia maumivu ya misukosuko ya kiuchumi iliyotawala mwaka 2025, upepo mpya unatarajiwa kuvuma mwaka 2026. Ripoti mpya kutoka gazeti lenye hadhi ya kimataifa la *Financial Times (FT)* imetoa matumaini mapya, ikitabiri kuwa sera ngumu za ushuru (tariffs) zilizokazwa na Marekani zitaanza kulegezwa kamba. Hii ni habari njema kwa wafanyabiashara wa kimataifa, wakiwemo wale wa Kariakoo na Tunduma, ambao wamekuwa wakiumia kutokana na kuyumba kwa mnyororo wa biashara duniani.
Kwanini Marekani 'inaweka mpira kwapani'? Wachambuzi wanasema kuwa hatua ya Marekani kutangaza ushuru wa kulipiza kisasi mwezi Aprili 2025 ilileta madhara makubwa kuliko faida. Soko la hisa lilitikisika, China ilitishia kujibu mapigo, na kubwa zaidi, bei za bidhaa kwa mtumiaji wa kawaida zilipaa. Hali hii imeifanya serikali ya Washington kutafakari upya na kutarajiwa kupunguza makali hayo mwaka 2026 ili kuzuia uchumi wao kuporomoka.
Katika ulingo wa siasa, mambo yanatarajiwa kuwa 'moto'. Uchaguzi wa katikati ya muhula nchini Marekani unaotazamiwa kufanyika Novemba 2026 unaweza kubadilisha uelekeo wa siasa za dunia. Chama cha Democratic kinatabiriwa kuipokonya 'timu ya Trump' (Republican) udhibiti wa Bunge la Wawakilishi (House of Representatives). Hii inamaanisha kuwa Rais Trump atakuwa na wakati mgumu kupitisha ajenda zake, na huenda akaandamwa na uchunguzi wa kina kuhusu utendaji wa serikali yake, jambo linaloweza kuleta sintofahamu mpya.
Hata hivyo, utabiri uliowashitua wengi ni ule unaohusu teknolojia ya Akili Mnemba (Artificial Intelligence - AI). Baada ya miaka mitatu ya mbwembwe nyingi tangu kuzinduliwa kwa ChatGPT, *FT* inasema "homa imeshuka". Wawekezaji sasa wameacha kufuata mkumbo na wameanza kudai faida halisi. Kampuni kama Nvidia, iliyokuwa ikikimbia peke yake, sasa inahisi pumzi za Google kisogoni, huku kampuni ya Meta ikishuka thamani. Hii ni tahadhari kwa makampuni madogo ya teknolojia (Startups) ambayo hayana msingi imara, kwani yanatarajiwa 'kufa kifo cha mende' au kufilisika kabisa.
Kwenye soko la magari, "Chuma" cha bilionea Elon Musk, Tesla, kiko mashakani. Utawala wa Tesla unatarajiwa kupungua kasi kutokana na kumalizika kwa ruzuku za kodi nchini Marekani na uvamizi wa magari ya bei nafuu kutoka China, yakiongozwa na kampuni ya BYD. Ushindani huu mkali katika masoko ya Marekani, Ulaya, na China unatarajiwa kuwafaidi walaji kwa kushusha bei, lakini ni pigo kwa Tesla.
Lakini, kama ilivyo ada, "kila lenye giza lina nuru yake". Wakati wawekezaji wakikimbia masoko ya teknolojia yenye mashaka na hofu ya vita vya kisiasa, wanakimbilia kwenye usalama wa Dhahabu. Hii ni habari njema sana kwa Tanzania, ambayo ni moja ya wazalishaji wakubwa wa madini hayo barani Afrika. *FT* inatabiri kuwa bei ya dhahabu inaweza kuvunja rekodi na kufikia Dola 5,000 kwa wakia moja (Ounce). Kwa fedha za madafu, hii ni sawa na takriban Shilingi za Kitanzania Milioni 13.2 kwa wakia moja. Kupanda huku kwa bei kunatokana na nchi nyingi kutaka kujilinda dhidi ya kuyumba kwa sarafu na nakisi ya bajeti.
Mwisho, Benki Kuu ya Marekani (The Fed) inatarajiwa kuendelea na sera yake ya kupunguza riba ili kuupa nguvu uchumi, licha ya hofu ndogo ndogo za mfumuko wa bei kusalia. Hii inaweza kusaidia kupunguza ukali wa upatikanaji wa Dola duniani, jambo ambalo limekuwa mwiba kwa nchi zinazoendelea.