Rais wa Marekani, Donald Trump, ametoa kauli kali akishutumu vikali maandamano yanayoendelea Los Angeles (LA) dhidi ya operesheni za kudhibiti wahamiaji haramu, akiyataja kama "uvamizi wa kigeni" na kuahidi kuchukua hatua kali. Akihutubia katika Kambi ya Kijeshi ya Fort Bragg, North Carolina, Trump alisisitiza kuwa hataruhusu miji ya Marekani "kuvamiwa na kutekwa na maadui wa kigeni." Alieleza kuwa matukio yanayoshuhudiwa California ni "shambulio kamili" dhidi ya amani, utulivu wa umma, na uhuru wa nchi, akidai kuwa "makundi ya wahuni wenye bendera za kigeni" yanaendelea kuishambulia Marekani.
Katika hotuba yake, Trump hakusita kuwakosoa Gavana wa California na Meya wa LA, akiwaita "wasiokuwa na uwezo" na kuwashutumu kwa "kuajiri watafuta shida, wachochezi, na waasi" ili kudhoofisha sheria za shirikisho. Alisisitiza kuwa viongozi hao wanasaidia "wahalifu kuwavamia na kuuteka mji."
Trump alitetea uamuzi wake wa kupeleka Walinzi wa Kitaifa na Kikosi cha Majini kwenye maeneo ya maandamano ili kulinda maafisa wa sheria wa shirikisho. Alieleza kwa hisia, "Mashujaa wa jeshi letu wamekuwa wakimwaga damu katika nchi za mbali, siyo kwa ajili ya kuiona nchi yetu ikiharibiwa na uvamizi na machafuko ya Kimataifa." Alieleza kuwa waandamanaji wa LA wanatumia matofali na nyundo kurusha mawe kwa polisi, na kuchoma magari kwa kutumia mabomu ya petroli, akiwafananisha na "waandamanaji wa kitaalamu" waliovalia fulana zisizopenya risasi na vifaa vya kulinda uso. Aliongeza kwa ukali, "Wao ni wanyama, wanabeba bendera za nchi nyingine kwa fahari lakini wanachoma bendera ya Marekani," na kuonya kwamba yeyote anayechoma bendera ya Marekani anapaswa kufungwa jela kwa mwaka mmoja.
Aidha, Trump alidai kuwa LA, ambayo aliieleza kuwa "mara moja ilikuwa mmoja wa miji safi, salama, na maridadi zaidi," sasa imekuwa "jaalala" linalodhibitiwa na "magenge ya uhalifu wa kimataifa na mitandao ya wahalifu." Alihusisha hali hii na uhamiaji usiodhibitiwa, akisema unasababisha "machafuko, utendaji mbaya, na vurugu," hali anayodai inatokea pia katika nchi za Ulaya. Aliahidi, "Nitaikomboa LA na kuifanya tena kuwa mji huru, safi, na maridadi."
Trump alisisitiza kuwa atatumia rasilimali zote zinazopatikana kukomesha ghasia na kurejesha sheria na utulivu mara moja. Alisisitiza kuwa hatasubiri Gavana kuchelewa kutoa wito kwa Walinzi wa Kitaifa kwa "siku 7 au 8," na kwamba hataruhusu mji "kuungua."
Ziara ya Trump katika kambi ya Fort Bragg pia ilikuwa mwanzo wa msururu wa matukio yaliyokuwa yakisherehekea miaka 250 ya jeshi la Marekani, ikiwemo gwaride la kijeshi lililofanyika Washington D.C. Juni 14 ilikuwa siku ya kuzaliwa kwa Trump, akitimiza miaka 79. Alisema hawajawahi kusherehekea ushindi vitani hapo awali, lakini kuanzia sasa wataendelea kusherehekea, akitangaza wiki hiyo kama wiki ya kusherehekea miaka 250 ya jeshi.
Kwa mujibu wa waandishi wa habari wa White House, kabla ya hotuba yake, Trump alishuhudia maonyesho ya uwezo wa kijeshi wa Marekani, ikiwemo kurusha kombora la HIMARS, operesheni maalum, na kuruka kwa wanajeshi 600 wa kikosi cha angani.
Fort Bragg ni kambi kubwa zaidi ya kijeshi nchini Marekani, ikiwa na makao makuu ya Kamandi ya Operesheni Maalum ya Jeshi na vitengo vilivyopewa mafunzo maalum kama vile Green Berets na Airborne Division. Kambi hii iliitwa jina la jenerali wa Muungano wa Kusini wakati wa Vita vya wenyewe kwa wenyewe vya Marekani, na mwaka 2023 ilibadilishwa jina kuwa 'Fort Liberty' chini ya utawala wa Biden, kabla ya kurejeshwa jina lake la asili, Fort Bragg, baada ya Trump kuingia madarakani.
Trump alifichua kuwa ana mpango wa kurejesha majina ya awali ya kambi nyingine zilizobadilishwa majina na utawala wa Biden, ikiwemo Fort Pickett, Fort Hood, na Fort Gordon.