Juhudi za kimataifa za miongo kadhaa za kutafuta amani ya kudumu Mashariki ya Kati kupitia mpango wa "suluhu ya mataifa mawili" ziko katika hatihati ya kuporomoka, baada ya Waziri Mkuu wa Israel, Benjamin Netanyahu, na baraza lake la mawaziri la usalama kufanya kikao cha kujadili mpango wa kuitwaa na kuimilikisha kisheria sehemu kubwa ya Ukingo wa Magharibi.
Hatua hii ya Israel, ambayo inaweza kuzika kabisa ndoto ya Wapalestina ya kuwa na nchi huru, inatajwa kuwa ni jibu la moja kwa moja kwa shinikizo la kimataifa. Hivi karibuni, nchi kadhaa zenye ushawishi duniani zikiwemo Ufaransa, Uingereza, Canada, na Australia zimeonyesha nia ya kulitambua Taifa la Palestina. Kitendo hiki kimeonekana kuikasirisha serikali ya Netanyahu, ambayo sasa inatishia kuchukua hatua hiyo kali.
Kwa mujibu wa taarifa zilizochapishwa na chombo cha habari cha Axios nchini Marekani, Waziri wa Masuala ya Kimkakati wa Israel, Ron Dermer, alimweleza wazi ofisa mmoja wa ngazi za juu wa Ufaransa kwamba iwapo jamii ya kimataifa itaendelea na mpango wa kuitambua Palestina, Israel haitasita kuitwaa na kuimilikisha kikamilifu eneo lote la "Zone C" katika Ukingo wa Magharibi. Eneo hili linachukua takriban asilimia 60 ya ardhi yote ya Ukingo wa Magharibi na linasimamiwa kiusalama na Israel chini ya Mkataba wa Oslo wa mwaka 1995.
Kama Israel itatekeleza tishio hili, maeneo ya Wapalestina yaliyobaki (Zone A na B) yatageuka kuwa visiwa vilivyotengwa na visivyo na muunganiko, na hivyo kufanya dhana ya kuwepo kwa taifa lenye mamlaka kamili kuwa ngumu.
Wakati hayo yakijiri, baraza hilo la mawaziri la usalama pia liliondoa kwenye ajenda yake mjadala kuhusu makubaliano ya kusitisha mapigano kwa muda, ambayo yangehusisha kuachiwa huru kwa mateka 10 wa Israel wanaoshikiliwa na kundi la Hamas. Hii inaashiria msimamo mkali zaidi wa Israel katika mzozo unaoendelea.
Katika uwanja wa mapambano, Jeshi la Israel lilitangaza mafanikio makubwa baada ya kudai kumuua msemaji mkuu wa Hamas, Abu Obeida, katika shambulio la anga lililolenga jengo la ghorofa katika Jiji la Gaza. Obeida, ambaye kwa miaka mingi amekuwa akijitokeza na uso uliofunikwa, anatajwa kuwa ndiye aliyekuwa anaongoza vita vya kisaikolojia vya Hamas dhidi ya Israel.