Wakati dunia nzima ikiwemo Tanzania ikisherehekea kuingia kwa mwaka mpya kwa vifijo na nderemo, hali imekuwa tofauti kabisa nchini Uholanzi ambapo "ngoma imeingia mchanga." Sherehe za kukaribisha mwaka mpya katika taifa hilo la Ulaya zimegeuka kuwa uwanja wa vita na maombolezo baada ya fataki kusababisha vifo vya watu wawili, mamia ya majeruhi, na uharibifu mkubwa wa miundombinu ikiwemo kuteketea kwa Kanisa la kihistoria.
Katika kile kinachoweza kuitwa 'furaha iliyogeuka karaha', mji mkuu wa Amsterdam uligubikwa na moshi mzito na ving'ora vya magari ya zimamoto. Tukio lililowashangaza wengi ni kuteketea kwa sehemu kubwa ya Kanisa la Vondel (Vondel Church), jengo la kifahari la tangu karne ya 19 ambalo ni urithi wa taifa hilo. Mashuhuda na ripoti za vyombo vya habari kama AFP na NL Times zinasema kuwa moto huo ulisababishwa na fataki zilizorushwa kiholela, na kupelekea mnara wa kanisa hilo wenye urefu wa mita 50 kuporomoka kwa kishindo. Ingawa mamlaka za Amsterdam zimesema kiunzi cha jengo bado kipo imara, paa la kanisa hilo limeharibika vibaya, jambo ambalo ni pigo kubwa kwa utamaduni na historia ya mji huo.
Hali ya simanzi haikuishia hapo. Katika mji wa Alsmmeer, uliopo Kusini-Magharibi mwa Amsterdam, mwanamume mmoja mwenye umri wa miaka 38 amepoteza maisha papo hapo kutokana na ajali ya kulipuka kwa fataki. Huzuni hiyo ilienea hadi mpakani mwa Mashariki katika mji wa Nijmegen, ambapo kijana mdogo wa miaka 17 naye alifariki dunia katika mazingira hayo hayo ya kutisha. Polisi wamethibitisha kumshikilia mtu mmoja kuhusiana na kifo cha kijana huyo, tukio ambalo limezua mjadala mkubwa nchini humo kuhusu usalama wa fataki hizi za mitaani.
Mahospitali nchini Uholanzi yalijikuta yakifanya kazi ya ziada usiku kucha. Madaktari wameuelezea usiku huo kama "usiku wa hekaheka na vurugu tupu." Hospitali ya Macho ya Rotterdam pekee ilipokea majeruhi 14, wakiwemo watoto 10, ambao wengi wao walijeruhiwa vibaya machoni wakati wakiangalia fataki hizo. Wawili kati yao walilazimika kufanyiwa upasuaji wa dharura kuokoa uoni wao. Hii ni idadi kubwa kwa usiku mmoja na inaonesha jinsi ambavyo kitu cha furaha kilivyogeuka kuwa janga la kitaifa.
Jambo la kusikitisha zaidi na lisiloingia akilini ni wimbi la ghasia lililoelekezwa kwa vyombo vya dola. Badala ya kushirikiana na polisi na waokoaji, baadhi ya raia waligeuka na kuanza kuwashambulia kwa fataki na vitu vizito. Mkuu wa Polisi wa Uholanzi, Wilbert Paulissen, amekaririwa akilaani vikali vitendo hivyo na kusema hawezi kuelewa ni kwa nini watu wanafanya ukatili wa kiasi hicho. "Tumetumia karibu kila askari wa kutuliza ghasia tuliyenaye nchini, na tumekamata wahalifu wapatao 250. Inashangaza kuona watu wakivaa 'maski' na kujipanga kushambulia polisi badala ya kusherehekea," alilalamika kiongozi huyo.
Kiongozi wa Chama cha Wafanyakazi wa Polisi, Nine Kooiman, naye alieleza kuwa alishambuliwa mara tatu kwa fataki na vilipuzi vingine wakati akitekeleza majukumu yake Amsterdam. Hali ilikuwa mbaya kiasi kwamba mamlaka ilibidi kutuma ujumbe wa dharura kwa simu za mkononi zikiwatahadharisha wananchi kutopiga simu za dharura isipokuwa kama ni suala la kufa na kupona, kwani mifumo ya uokoaji ilikuwa imelemewa.
Licha ya serikali ya Uholanzi kupiga marufuku uuzaji wa rejareja wa fataki kuanzia mwaka huu ili kupunguza ajali kama hizi, takwimu zinaonyesha kuwa wananchi walikaidi au walinunua kabla ya zuio hilo kuanza kazi. Inakadiriwa kuwa kiasi cha Euro Milioni 129 (sawa na takriban Shilingi za Kitanzania Bilioni 370) kilitumika kununua fataki hizo. Hii ni pesa nyingi sana ambayo mwisho wake imeishia kusababisha vifo, ulemavu na uharibifu wa mali, jambo ambalo linaacha funzo kubwa kwa mataifa mengine kuhusu udhibiti wa sherehe hizi za mwisho wa mwaka.