Mashambulizi ya anga ya Israel katika Ukanda wa Gaza yamepamba moto, na kusababisha vifo vya Wapalestina wasiopungua 89 ndani ya saa 24 zilizopita pekee. Hali hii inajiri baada ya Baraza la Mawaziri la Benjamin Netanyahu kupitisha sera ya upanuzi wa uvamizi wao, ikizidisha mateso kwa wakazi wa Gaza.
Kwa mujibu wa ripoti kutoka vyanzo mbalimbali vya habari vya kimataifa, ikiwemo gazeti la The Guardian, mamlaka ya ulinzi wa raia ya Gaza imethibitisha kuwa mashambulizi ya Israel yamekuwa makali zaidi katika siku tatu zilizopita. Mamlaka hizo zinasema tangu Oktoba 7, 2023, mashambulizi haya yamesababisha vifo vya jumla ya Wapalestina 61,599 na kujeruhi 154,088.
Moja ya matukio ya kusikitisha yaliyotokea kati ya Oktoba 11 na 12 ni pale Wapalestina wasiopungua 15, wengi wao wakiwa wakisubiri foleni kupata msaada wa chakula kaskazini mwa Gaza, walipouawa katika shambulizi la anga. Tukio hili linaonyesha jinsi raia wanavyokabiliana na hatari kila mahali, hata wanapojaribu kupata mahitaji muhimu ya maisha.
Kutokana na udhibiti mkali wa jeshi la Israel, misaada ya kibinadamu inashindwa kufika Gaza kwa kiwango cha kutosha. Hili limesababisha ongezeko kubwa la vifo vinavyosababishwa na utapiamlo na njaa. Wizara ya Afya ya Gaza imeripoti kuwa tangu Oktoba mwaka jana, idadi ya vifo vya njaa imefikia 227, ambapo 103 kati ya hao ni watoto. Hali hii inaendelea kuwa mbaya kila siku na inasababisha mgogoro mkubwa wa kibinadamu unaohitaji msaada wa haraka kutoka jumuiya ya kimataifa.
Licha ya kuongezeka kwa ukubwa na nguvu za mashambulizi ya angani, bado hakuna dalili wazi kwamba wanajeshi wa ardhini wa Israel wamefanya maendeleo zaidi katika mji wa Gaza. Hali inabaki kuwa tete na hatari kwa Wapalestina, ambao wanateseka kutokana na vita inayoendelea.