Ofisi ya rais wa zamani wa Marekani, Joe Biden, imetoa taarifa ikieleza kuwa kiongozi huyo anaendelea vizuri baada ya kufanyiwa upasuaji wa saratani ya ngozi. Upasuaji huo, unaojulikana kitaalamu kama 'Mohs surgery', ni mbinu ya hali ya juu ambapo madaktari huondoa tabaka za ngozi zenye saratani moja baada ya nyingine hadi pale seli zote za ugonjwa huo zinapoondolewa kabisa.
Ingawa haijabainika ni lini hasa upasuaji huo ulifanyika, picha zilizosambaa mwishoni mwa mwezi uliopita zilimwonyesha Biden mwenye umri wa miaka 82 akitoka kanisani huko Delaware akiwa na kovu kubwa na la wazi kichwani.
Hii si mara ya kwanza kwa Biden kupambana na saratani. Hata alipokuwa madarakani, alifanyiwa upasuaji mwingine. Mnamo mwaka 2023, daktari wake mkuu, Kevin O'Connor, alithibitisha kuwa Biden aliondolewa kinyama chenye saratani kifuani. Uchunguzi ulionyesha kuwa ilikuwa ni saratani ya seli ya msingi (basal cell carcinoma), ambayo ni moja ya aina mbili za saratani za ngozi zilizozoeleka zaidi. Hata wakati huo, alitibiwa kwa kutumia mbinu ya Mohs, na daktari wake alihakikisha kuwa "tishu zote za saratani ziliondolewa kwa mafanikio na hakuna matibabu zaidi yaliyohitajika." Mkewe, Jill Biden, naye aliondolewa vidonda viwili vya aina hiyo hiyo ya saratani mwaka 2023.
Hata hivyo, pambano kubwa zaidi kwa Biden lilifichuliwa mwezi Mei mwaka huu, alipotangaza kuwa amegundulika kuwa na saratani ya tezi dume (prostate cancer) ambayo ni kali na tayari imesambaa hadi kwenye mifupa. Ofisi yake ilieleza kuwa madaktari wanapitia mbinu mbalimbali za matibabu ili "kuidhibiti ipasavyo" saratani hiyo. Ilielezwa pia kuwa saratani yake inaonekana "kuitikia matibabu ya homoni," jambo ambalo wataalamu wanasema linatoa matumaini makubwa ya mafanikio katika matibabu.
Kufuatia tangazo hilo, wanasiasa kutoka pande zote za Republican na Democrat walimiminia sifa, wakimwita "mtu mwenye ustahimilivu" na kumtakia nafuu ya haraka. Hata hivyo, muda mfupi baadaye, Rais Donald Trump na baadhi ya wasaidizi wake walianza kuibua maswali, wakidokeza kuwa huenda Biden alikuwa anafahamu kuhusu ugonjwa wake wa saratani alipokuwa madarakani na akaamua kuuficha.