Mahakama ya Juu nchini Brazil imeongeza ukali wa hatua za kisheria dhidi ya Rais wa zamani wa taifa hilo, Jair Bolsonaro, kwa kuamuru awekwe chini ya ulinzi na uangalizi wa polisi kwa saa 24 kila siku. Uamuzi huu mkali unakuja huku kukiwa na hofu kubwa kwamba kiongozi huyo wa zamani anaweza kujaribu kutoroka nchini ili kukwepa mkono wa sheria unaomkabili kutokana na tuhuma nzito, ikiwemo kupanga mapinduzi.
Jaji wa Mahakama ya Juu, Alexandre de Moraes, ndiye aliyetoa agizo hilo mnamo Jumanne, akisema kuwa kuna ulazima wa polisi kuanzisha doria ya kudumu nyumbani kwa Bolsonaro. Jaji Moraes alieleza kuwa hatua hiyo inalenga kuhakikisha Bolsonaro hahepi kabla ya kesi yake kuu kuanza kusikilizwa mwezi Septemba. Ofisi ya Mwendesha Mashtaka Mkuu pia iliunga mkono uamuzi huu, ikionyesha uzito wa hali ilivyo.
Hofu ya Bolsonaro kutoroka imechochewa na taarifa za kijasusi pamoja na vitendo vya mwanawe, Eduardo Bolsonaro, ambaye yuko nchini Marekani. Jaji Moraes alisema katika uamuzi wake, "vitendo vya mara kwa mara vya Eduardo Bolsonaro akiwa nchi ya kigeni (Marekani), vinaashiria uwezekano wa mshtakiwa (Jair Bolsonaro) kutafuta njia za kukwepa adhabu za kisheria." Hii ni pamoja na ukweli kwamba tayari Bolsonaro yuko chini ya kifungo cha nyumbani na anavalia kifaa cha kielektroniki cha kumfuatilia mienendo yake (electronic tag).
Rais huyo wa zamani anakabiliwa na msururu wa mashtaka mazito. Anadaiwa kupanga njama za mapinduzi ya kijeshi akiwa na mawaziri wake baada ya kushindwa katika uchaguzi mkuu wa mwaka 2022 dhidi ya Rais wa sasa, Luiz Inácio Lula da Silva. Vilevile, anatuhumiwa kwa kuwachochea wafuasi wake kuvamia majengo ya serikali na bunge katika ghasia za Januari 8, 2023, kwa lengo la kupinga matokeo ya uchaguzi. Zaidi ya hayo, jina lake limehusishwa na mpango wa kutaka kumuua Rais Lula.
Sakata hili limevuka mipaka ya Brazil na kuingia katika siasa za kimataifa. Rais wa Marekani, Donald Trump, ambaye ni rafiki wa karibu wa Bolsonaro, ameingilia kati na kuelezea kesi hiyo kama "uwindaji wa wachawi." Katika hatua iliyozua mjadala wa kuingilia mambo ya ndani ya nchi nyingine, Trump alitishia na kisha kutangaza ushuru wa forodha wa 50% kwa bidhaa kutoka Brazil kama njia ya kuishinikiza serikali ya Lula. Wakati huohuo, mtoto wa Bolsonaro, Eduardo, anaripotiwa kufanya shughuli za ushawishi (lobbying) nchini Marekani, akikutana na watu wa karibu na utawala wa Trump ili kujaribu kumpatia msaada baba yake.