Kama ilivyo desturi katika siasa za Tanzania, misimu ya uchaguzi mara nyingi hutawaliwa na uhamaji wa wanasiasa maarufu. Hali hii imeendelea kujirudia, na mwaka huu wa uchaguzi umemshuhudia aliyekuwa Mbunge wa Kisesa kwa muda mrefu, Luhaga Mpina, akihama Chama Cha Mapinduzi (CCM) na kujiunga na Chama cha ACT-Wazalendo, ambacho sasa kimemteua kuwa mgombea wake wa urais wa Jamhuri ya Muungano wa Tanzania. Hatua hii inamuweka Mpina katika orodha ya viongozi mashuhuri waliofanya uhamaji kama huo huko nyuma.
Historia inaonyesha wanasiasa kadhaa waandamizi walipishana na msimamo wa CCM na kuhamia vyama vya upinzani ili kuwania urais. Mwaka 1995, aliyekuwa Waziri wa Kazi, Augustine Mrema, alijiunga na NCCR-Mageuzi na kugombea urais dhidi ya Benjamin Mkapa. Vivyo hivyo, Waziri Mkuu mstaafu Edward Lowassa alihama CCM na kujiunga na CHADEMA mwaka 2015, akichuana na John Magufuli. Mnamo mwaka 2020, Bernard Membe pia alikihama chama chake na kuungana na ACT-Wazalendo, akigombea urais dhidi ya mgombea wa chama chake cha zamani. Vile vile, marehemu Maalim Seif Sharif Hamad alihama CUF na kwenda ACT-Wazalendo, ambapo aliteuliwa kuwa mgombea urais wa Zanzibar.
Wachambuzi wa siasa wanatazama hatua ya Mpina kama mwendelezo wa mwelekeo huu. Hivi karibuni, Mpina alikinzana na Mwenyekiti wa CCM Taifa, Rais Samia Suluhu Hassan, hasa wakati wa ziara ya rais huyo jimboni Kisesa, ambapo alikosoa kauli na madai ya mbunge huyo.
Kwa mujibu wa wachambuzi mbalimbali, hatua hii ya Mpina haishangazi. Naibu Katibu Mkuu wa CUF, Magdalena Sakaya, anasema uhamaji huu ni haki yake ya kikatiba. Anaongeza kuwa mwanasiasa huyu alinyanyaswa kwa kusimamia ukweli, na huenda alikosa jukwaa ndani ya chama chake, hivyo alilazimika kutafuta mahali pengine. Maggid Mjengwa, mchambuzi wa siasa, anasema wanasiasa ni kama samaki majini, wanahitaji kuogelea ili waishi, hivyo Mpina alilazimika kutafuta "bwawa" jingine la kisiasa baada ya kutofautiana na CCM. Anasisitiza kwamba vyama vya siasa nchini Tanzania havina itikadi zinazotofautiana sana, hivyo uhamaji wa wanasiasa maarufu ni jambo la kawaida.
Abdulkarim Atiki anachukulia hatua ya Mpina kama ukomavu wa kisiasa, akisema ACT-Wazalendo wamefanya uamuzi wa busara kumchukua. "Sio siri anauzika, ndio maana ACT-Wazalendo wamempisha awanie urais," anasema Atiki. Anaamini Mpina, licha ya kuwa huenda asishinde, ataimarisha chama hicho na kuendelea kupata umaarufu mkubwa. Wachambuzi wote wanasisitiza kuwa uhamaji huu ni haki ya kikatiba ya Mpina, na haipaswi kuonekana kama usaliti bali ni hatua ya kuendeleza harakati zake za kisiasa alizoamini zilikandamizwa.