Nchini Nepal, binti mdogo wa umri wa miezi 32, Aryatara Shakya, amechaguliwa kuwa "Kumari" mpya, yaani Mungu Mke anayeishi. Baada ya uteuzi wake, mtoto huyo aliongozwa katika maandamano makubwa ya kidini na kuingizwa katika hekalu la kifahari ambako ataishi maisha ya kuabudiwa hadi atakapovunja ungo.
Wakati Kumari mpya akianza maisha yake ya uungu, aliyekuwa akishikilia wadhifa huo, Trishna Shakya mwenye umri wa miaka 11, alistaafu rasmi. Alitolewa nje ya hekalu akiwa amebebwa kwenye machela maalum na kurejeshwa kwa familia yake ili aishi maisha ya kawaida.
Utamaduni wa Kumari ni wa kipekee nchini Nepal, ambapo wasichana wadogo kutoka ukoo wa Shakya wa jamii ya Newar huchaguliwa na kuheshimiwa kama miungu hai na waumini wa dini za Kihindu na Kibuddha. Kumari daima huvalishwa mavazi mekundu, nywele zake husukwa kwa mtindo maalum wa juu, na huchorwa "jicho la tatu" kwenye paji la uso wake.
Vigezo vya uteuzi ni vikali mno; msichana anapaswa kuwa na umri kati ya miaka miwili na minne, awe na mwili usio na kovu wala kasoro yoyote, nywele na macho vikiwa vyeusi, na asiwe na woga wa giza. Familia nyingi hushindana ili binti zao wachaguliwe, kwani hadhi hii huipa familia heshima kubwa katika jamii.
Hata hivyo, maisha ya Kumari ni ya upweke. Anaishi ndani ya hekalu na haruhusiwi kutoka nje isipokuwa wakati wa sherehe chache za kidini kwa mwaka. Kwa sababu hiyo, wasichana waliowahi kuwa Kumari hukumbana na changamoto kubwa ya kuzoea maisha ya kawaida pindi wanapostaafu, huku wengi wakisumbuka kupata wachumba kutokana na imani potofu kuwa mwanamume atakayemuoa atakufa mapema.
Kutokana na changamoto hizi, mabadiliko yameanza kufanywa. Siku hizi, Kumari anaruhusiwa kupata elimu kutoka kwa mwalimu binafsi ndani ya hekalu na kuwa na televisheni. Aidha, serikali ya Nepal huwalipa pensheni ya kila mwezi ya takriban Dola za Marekani 110 (kama Shilingi 286,000 za Kitanzania) wale waliostaafu ili kuwasaidia katika maisha yao mapya.