Mshtuko umetanda nchini China baada ya kugundulika kuwa kijana mmoja mwenye umri wa miaka 10 alikuwa na waya wenye urefu wa sentimita 7 ndani ya mrija wake wa mkojo.
Kulingana na gazeti la Changjiang Daily la China, mnamo Machi mwaka huu, kijana huyo alifika hospitalini akilalamikia maumivu kwenye korodani zake. Katika uchunguzi wa awali wa ultrasound, ilionyesha tu uvimbe mdogo, na hivyo akapewa dawa za antibiotiki.
Hata hivyo, hali yake ilizidi kuwa mbaya baada ya mwezi mmoja. Alirudi hospitalini akiwa na maumivu makali na uvimbe mkubwa kwenye korodani zake.
Madaktari walishuku uwezekano wa kuwa na uvimbe, hivyo walifanya uchunguzi wa CT scan. Matokeo yalionyesha kuwepo kwa waya, wenye urefu takriban sentimita 7, ukiwa umefika ndani kabisa ya mrija wake wa mkojo.
Ilibainika kuwa waya huo ulikuwa sehemu ya chuma inayosaidia umbo la barakoa (mask). Waya huo ulikuwa umeingizwa kwenye mrija wa mkojo na kufika hadi kwenye eneo la korodani.
Baada ya kuhojiwa mara kadhaa na daktari, kijana huyo alikiri kuwa aliweka waya huo kwenye mrija wake wa mkojo kwa udadisi, lakini alishindwa kuutoa. Aliongeza kuwa aliogopa kuwajulisha wazazi wake kwa kuhofia adhabu.
Mara moja, madaktari walifanya upasuaji ili kuondoa waya huo, na inaripotiwa kuwa kijana huyo anaendelea vizuri.
Madaktari walisisitiza umuhimu wa elimu sahihi ya ngono na uangalizi kwa watoto wanaokaribia au waliofikia umri wa balehe, kwani wanaweza kufanya vitendo hatari kutokana na udadisi kuhusu miili yao.
Watumiaji wa mtandao walitoa maoni mbalimbali, wengi wakishangazwa na tukio hilo. Baadhi walisema, "Nani angefikiria kuwa waya wa barakoa unaweza kusababisha jambo kama hili?" na "Udadisi ni hatari. Waya ulikuwa ndani ya mwili kwa miezi mitatu!"