Nchini Cuba, kauli moja ya dharau iliyopuuza hali halisi ya maisha ya wananchi imemgharimu cheo chake Waziri wa Kazi, Marta Elena Feitó Cabrera, na kumlazimisha kujiuzulu baada ya kuzuka kwa hasira na shinikizo kubwa kutoka kwa umma na viongozi wakuu wa serikali.
Tukio hilo lilianza wakati Waziri Feitó, akizungumza katika kikao cha Bunge la Kitaifa, alipotoa kauli iliyowashangaza wengi. Alidai kuwa nchini Cuba hakuna ombaomba na kwamba watu wanaoonekana wakichakura kwenye mapipa ya taka wanafanya hivyo kwa sababu wanatafuta "pesa rahisi."
Kauli hiyo ilisambaa kwa kasi na kuzua ghadhabu miongoni mwa Wacuba, ambao wengi wao wanakabiliwa na mojawapo ya migogoro mibaya zaidi ya kiuchumi katika historia ya nchi hiyo, ikiambatana na uhaba mkubwa wa chakula, dawa, na mahitaji mengine ya msingi.
Wanaharakati, wasomi, na wananchi wa kawaida walimiminika kwenye mitandao ya kijamii, wakielezea matamshi ya waziri huyo kama dharau kwa watu wanaoteseka na ishara ya kiongozi kuwa mbali na uhalisia wa maisha ya watu anaowaongoza. Vuguvugu la kumtaka ajiuzulu lilishika kasi, huku hata Rais wa nchi hiyo, Miguel Díaz-Canel, akiripotiwa kutofurahishwa na kauli hiyo.
Kutokana na shinikizo hilo kubwa kutoka ndani na nje ya serikali, Waziri Feitó hakuwa na njia nyingine isipokuwa kutangaza kujiuzulu kwake wiki hii. Kisa chake kimekuwa funzo kwa viongozi wa umma kuhusu umuhimu wa kuwa na lugha ya staha na kuheshimu changamoto zinazowakabili wananchi.