Mzozo wa Mashariki ya Kati umechukua sura mpya na ya kutisha kufuatia kauli ya waziri mwenye msimamo mkali ndani ya serikali ya Israel, aliyetoa wito wa kunyakua na kuifanya sehemu kubwa ya eneo la Ukingo wa Magharibi kuwa ardhi ya Israel. Pendekezo hili limezua hasira na shutuma kali kutoka kwa mataifa ya Kiarabu, ambayo yameonya kuwa hatua hiyo itahatarisha usalama wa kanda nzima.
Waziri wa Fedha wa Israel, Bezalel Smotrich, ndiye aliyeibua mjadala huo moto alipofanya mkutano na waandishi wa habari akiwa ameshikilia ramani ya Ukingo wa Magharibi. Alisema bila kusita, "Mamlaka kamili ya Israel yanapaswa kutumika katika takriban asilimia 82 ya eneo hili." Smotrich, ambaye anatoka katika chama cha siasa kali za kizalendo, alidai kuwa taifa lake lina "haki ya kibiblia, kihistoria, na kimaadili juu ya ardhi yetu yote."
Alimtaka Waziri Mkuu, Benjamin Netanyahu, kufanya kile alichokiita "uamuzi wa kihistoria" wa kutawala maeneo yote ya wazi ya 'Yudea na Samaria', akitumia majina ya kibiblia yanayotumiwa na Waisraeli wenye msimamo mkali kurejelea Ukingo wa Magharibi. Kauli hii inakuja mwezi mmoja tu baada ya Smotrich kuidhinisha ujenzi wa takriban nyumba 7,000 za walowezi wa Kiyahudi katika eneo hilo.
Historia inaonyesha kuwa Israel ilikalia kijeshi Ukingo wa Magharibi, ambalo awali lilikuwa eneo la Jordan, wakati wa Vita vya Siku Sita mwaka 1967.
Reakshoni kutoka kwa ulimwengu wa Kiarabu ilikuwa ya haraka na kali. Jumuia ya Ushirikiano wa Nchi za Ghuba (GCC), inayoundwa na Bahrain, Kuwait, Oman, Qatar, Saudi Arabia na Umoja wa Falme za Kiarabu (UAE), ililaani vikali kauli hiyo. Katibu Mkuu wa GCC, Jassim Muhammad Al-Budaiwi, alisema, "Tunalaani kwa maneno makali kabisa madai haya hatari na ya kutiliwa shaka... Kauli za kichochezi kama hizi zinaonyesha jinsi Israel inavyoyumbisha usalama." Alitoa wito kwa jumuiya ya kimataifa kuingilia kati mara moja.
Onyo zito zaidi lilitoka kwa Umoja wa Falme za Kiarabu (UAE), mmoja wa washirika muhimu wa Israel chini ya 'Makubaliano ya Abraham'. Mjumbe Maalum wa Wizara ya Mambo ya Nje ya UAE, Lana Nusseibeh, alisema hatua ya Israel kunyakua Ukingo wa Magharibi itakuwa "msitari mwekundu" ambao utaharibu kabisa maono ya makubaliano hayo na kusitisha juhudi zote za ushirikiano wa kikanda. "Hatupaswi kuruhusu watu wenye misimamo mikali kuamua mwelekeo wa Mashariki ya Kati," alisisitiza, akitaka mipango ya upanuzi wa makazi ya walowezi isimamishwe.