Ziara ya Kihistoria Kusisitiza Undugu
Rais wa Umoja wa Visiwa vya Comoro, Kanali Azali Assoumani, ameongoza ujumbe wa viongozi waandamizi kutembelea Kambi Maalumu ya Matibabu ya Kibingwa inayoendeshwa na madaktari kutoka Tanzania katika Hospitali ya Hombo, Kisiwa cha Anjouan. Ziara hii ya kihistoria, iliyofanyika kuwapongeza madaktari hao, imesisitiza zaidi uhusiano wa undugu na ushirikiano wa kudumu kati ya nchi hizi mbili.
Katika ziara hiyo, Rais Azali aliambatana na viongozi muhimu, wakiwemo Dk. Zaidou Youssouf (Gavana wa Anjouan), Ahamadi Sidi Nahouda (Waziri wa Afya), Youssoufa Mohamed Ali (Waziri wa Ulinzi), na uongozi wa Chama Tawala cha CRC.
Madaktari hao bingwa 52 kutoka Tanzania wanatoa huduma za kibingwa bure kwa wananchi wa Anjouan, ikiwa ni matokeo ya uratibu thabiti kati ya Serikali ya Jamhuri ya Muungano wa Tanzania na Serikali ya Comoro. Balozi wa Tanzania nchini Comoro, Said Yakubu, alimkabidhi Rais Azali timu hiyo iliyojumuisha wataalamu kutoka hospitali kuu tano za taifa, zikiwemo Muhimbili National Hospital (MNH), Benjamin Mkapa Hospital (BMH), Taasisi ya Moyo ya Jakaya Kikwete (JKCI), Taasisi ya Saratani ya Ocean Road (ORCI), na Taasisi ya Mifupa na Ubongo Muhimbili (MOI). Msafara huo pia ulihusisha Bohari ya Dawa (MSD) na taasisi ya Global Medicare, ambayo ndiyo mratibu mkuu.
Shukrani za Rais Azali na Zawadi za Upendo
Baada ya utambulisho wa timu, taasisi zote za Tanzania zilitumia fursa kutoa zawadi za upendo na kumbukumbu kwa Serikali ya Comoro, ikiwa ni ishara ya urafiki, upendo, na ushirikiano wa kudumu katika sekta ya afya. Zawadi hizo zilionyesha dhamira ya Tanzania kuendelea kushirikiana kwa dhati na Comoro.
Rais Azali Assoumani alipata fursa ya kusalimiana na madaktari hao mmoja mmoja, akionyesha upendo na uthamani wa mchango wa Tanzania katika afya ya Comoro.
Katika hotuba yake fupi, Rais Azali alitoa shukrani za dhati kwa Balozi wa Tanzania kwa ushirikiano mzuri na aliomba awasilishe salamu maalumu za pongezi na upendo kwa Rais wa Jamhuri ya Muungano wa Tanzania, Dkt. Samia Suluhu Hassan.
“Tunamshukuru sana Mheshimiwa Rais Samia Suluhu Hassan kwa moyo wake wa kindugu na wa kibinadamu. Huduma hii si ya kirafiki tu, bali ni ishara ya undugu wa kweli kati ya Comoro na Tanzania. Tumeguswa sana na upendo huu wa dhati,” alisema Rais Azali kwa hisia.
Ziara hii imesisitiza kuwa Tanzania ni mfano wa kuigwa katika kanda ya Afrika Mashariki na Kusini mwa Jangwa la Sahara, kwa juhudi zake za kusaidia mataifa jirani kupitia dhana ya diplomasia ya afya na utu.