Hatimaye, mwigizaji maarufu wa Hollywood, Chloë Grace Moretz (28), amefunga pingu za maisha na mpenzi wake wa muda mrefu, mwanamitindo Kate Harrison (34), baada ya kudumisha uhusiano wao wa kimapenzi kwa takriban miaka sita. Habari za ndoa hiyo zimeripotiwa na jarida mashuhuri la mitindo la Vogue, likieleza kuwa sherehe hiyo ilifanyika mwishoni mwa wiki ya Siku ya Wafanyakazi nchini Marekani.
Sherehe hiyo imetajwa kuwa ya kipekee, hasa kutokana na mavazi ya maharusi. Chloë Moretz alivunja utamaduni wa kawaida kwa kuamua kuvaa gauni la rangi ya bluu isiyokolea (powder blue) lililotengenezwa na nembo ya kifahari ya Louis Vuitton, huku akipendezesha muonekano wake na glovu ndefu. Kwa upande wake, Kate Harrison aling'aa ndani ya gauni jeupe la harusi, na kuleta picha ya kimahaba iliyowavutia wengi.
Jarida la Vogue lilipata fursa ya kipekee ya kushuhudia na kupiga picha wakati maharusi hao walipokuwa wakifanya vipimo vyao vya mwisho katika makao makuu ya Louis Vuitton jijini Paris, Ufaransa.
Katika mahojiano na Vogue, Chloë alifunguka kuhusu uamuzi wake wa kuvaa gauni la rangi tofauti. "Tangu nikiwa mdogo, sikuwahi kuwa na ndoto maalum ya gauni jeupe la harusi. Hivyo, tulipoanza kuzungumzia hili, nilitaka kitu ambacho si cha kawaida. Nilitaka kujisikia tofauti, na gauni hili limenipa hisia hiyo haswa," alisema mwigizaji huyo anayefahamika kwa filamu kama 'Kick-Ass'.
Katika kuongeza utamu wa siku yao maalum, wawili hao walikubaliana kuweka siri mavazi yao na kutoonana wakiwa wamevaa hadi wakati wa sherehe, jambo ambalo Kate Harrison alisema liliongeza uzito na hisia za kipekee kwenye viapo vyao.
Chloë na Kate walianza uhusiano wao mwaka 2018. Walianza kuashiria uchumba wao mwishoni mwa mwaka jana walipochapisha picha wakiwa wamevalia pete za almasi za uchumba. Kate Harrison ni mwanamitindo na binti wa mwigizaji mkongwe Gregory Harrison pamoja na mwanamitindo Randi Oakes.