Wakazi wa Kijiji cha Mapili, Wilaya ya Mlele mkoani Katavi, wametoa shukrani zao za dhati kwa serikali ya awamu ya sita inayoongozwa na Rais Samia Suluhu Hassan, wakisema mradi wa umeme uliotekelezwa na Wakala wa Nishati Vijijini (REA) umekuwa mkombozi mkubwa kwao. Shukrani hizi zilitolewa wakati wa kampeni maalum ya REA ya kuhamasisha matumizi ya umeme kwa ajili ya shughuli za kiuchumi, kampeni inayoendelea kote nchini.
Akizungumza kwa niaba ya wananchi, Mwalimu Mstaafu, Amos Katawa, alisema maisha ya Kijiji cha Mapili yamebadilika kabisa tangu umeme ulipofika. "Kabla ya umeme, usiku ulikuwa giza, lakini sasa tunaishi kwa amani na baadhi ya shughuli za kimaendeleo zinafanyika hata usiku," alisema Katawa, akiongeza kuwa wananchi wanaweza kutazama runinga na kupata habari muda wowote, na pia vijana wengi wamepata ajira kupitia fursa zilizotokana na umeme.
Mabadiliko haya yameonekana pia kwa mafundi. Mrisho Mussa, fundi uchomeleaji, alieleza kuwa hapo awali walilazimika kwenda mjini Inyonga kutafuta huduma za umeme, jambo lililosababisha gharama kubwa na usumbufu kwa wateja. "Sasa mambo yote tunafanya hapa kijijini, hakuna haja tena ya kurudi mjini. Hii imepunguza gharama za uzalishaji na kuongeza tija," alisema Mussa, akisisitiza mafundi na wataalamu wengine kutokimbilia mijini kwa kuwa huduma zote zinapatikana kijijini.
Kwa wanawake, umeme umepunguza mzigo mkubwa wa kazi za nyumbani. Scholastica Kitwewe, mkazi mwingine wa kijiji hicho, alisema umeme umewarahisishia maisha kwa sababu sasa kuna mashine za kusaga na kukoboa nafaka kijijini hapo. Hapo awali walitumia muda mwingi kusaga mahindi kwa kutumia vinu vya mikono. Hili limewaokoa muda na kuwarahisishia shughuli zao za kila siku.
Useremala pia umenufaika pakubwa. Elasto Mwampaya, maarufu kama Fundi Lam, alisema umeme umemuwezesha kupanua karakana yake na kutengeneza fanicha zenye ubora wa hali ya juu anazouza hata mikoa mingine. "Sasa ninaweza kuajiri vijana wengi na kuwapa mafunzo ya kutumia vifaa vya kisasa vinavyotumia umeme," alisema Fundi Lam, akionyesha jinsi umeme ulivyochochea ajira na ujuzi kijijini.
Mwenyekiti wa kijiji, Anthony Mwijuma, aliipongeza REA na kutoa shukrani kwa serikali akisema umeme umekuwa baraka kwa wananchi wake. Alisema umeme umewezesha vijana wengi kuanzisha miradi na biashara ndogondogo, kama vile biashara ya vinywaji, vifaa vya simu, na hata useremala, jambo ambalo limeleta mageuzi makubwa.
Msimamizi wa miradi ya REA mkoani Katavi, Mha. Gilbert Furia, alithibitisha kuwa mradi huo umetekelezwa kwa mafanikio makubwa. "Vijiji vyote 49 katika Halmashauri za Mlele na Mpimbwe vimefikiwa na umeme," alisema, akiongeza kuwa kazi inaendelea ya kusambaza umeme katika vitongoji 176 kati ya 251. Katibu Tawala wa Wilaya ya Mlele, Yahaya Mbulu, alihitimisha kwa kusema, "Mlele ya jana sio ya leo, hatua imepigwa, na tunamshukuru Rais Samia."