Mkuu wa Mkoa wa Mwanza, Mheshimiwa Said Mtanda, ametoa agizo kali kwa Halmashauri ya Manispaa ya Ilemela, akiipa siku saba tu kuwasilisha mpango kazi madhubuti wa kukabiliana na tatizo sugu la uchakavu wa magari 10 ya halmashauri hiyo. Agizo hili limelenga kuzuia uchakavu huo kuathiri vibaya utendaji kazi wa kila siku wa Manispaa na kutoa huduma kwa wananchi.
Agizo hili limetolewa wakati wa mkutano maalum wa Baraza la Madiwani wa Manispaa ya Ilemela, ambapo walikuwa wakipokea na kujadili hoja zilizotolewa na Mdhibiti na Mkaguzi Mkuu wa Hesabu za Serikali (CAG) kwa mwaka wa fedha 2023/2024. Mkuu wa Mkoa Mtanda alisisitiza umuhimu wa mpango huo kuainisha wazi matatizo ya kila gari na gharama halisi zinazohitajika kwa ukarabati. "Baada ya kupokea mpango huo, nitatoa miezi miwili tu kuhakikisha magari yote yamekamilika na yanaanza kutumika," alionya Mtanda. Aliahidi kufanya ukaguzi wa ghafla ili kuhakikisha tatizo hili halijirudii tena katika vikao vijavyo vya ukaguzi.
"Utaratibu wangu wa kazi, sipendi kuona magari ya serikali yakiwa yameegeshwa bila kutumika, hasa yale ambayo yanahitaji matengenezo madogo tu, mfano milioni moja, mbili au tatu. Hapa Ilemela hamuwezi kushindwa na gharama hizo," aliongeza Mheshimiwa Mtanda, akisisitiza umuhimu wa usimamizi mzuri wa mali za umma.
Aidha, RC Mtanda aliitaka viongozi wa Halmashauri ya Ilemela kushirikiana kwa karibu na ofisi ya CAG pamoja na ofisi ya Mkuu wa Wilaya ili kuhakikisha hoja zote nne zilizobainishwa zinapata majibu stahiki. Alisisitiza kuwa jukumu lao si kuzalisha hoja mpya bali kuzifunga hoja zilizopo kwa wakati kwa kushirikisha ipasavyo idara zote husika.
Akitoa majibu ya ukaguzi huo, CPA Richson Ringo, Mkaguzi Mkuu wa Nje wa Mkoa wa Mwanza, alithibitisha kuwa Manispaa ya Ilemela imepata hati safi (unqualified opinion) kwa mwaka wa fedha 2023/2024. Hata hivyo, Ringo alibainisha kuwa baadhi ya hoja hazikufungwa kutokana na kukosekana kwa mikakati thabiti na ya dhati kutoka kwa watekelezaji wa majukumu. Pia alionyesha wasiwasi wake kuhusu kutokushirikishwa ipasavyo kwa wakuu wa idara, na kwamba baadhi ya majibu ya menejimenti yalikosa vielelezo na ushahidi wa kutosha kukamilisha kufungwa kwa hoja hizo.
Kwa upande wake, Mkurugenzi wa Halmashauri ya Manispaa ya Ilemela, Bi. Ummy Wayayu, alikiri kuwa uchakavu wa magari unaathiri kwa kiasi kikubwa utendaji kazi wa halmashauri, hasa katika ufuatiliaji wa mapato na shughuli mbalimbali za nje zinazohitaji usafiri. Alisema kuwa tayari hatua mbalimbali zinaendelea kuchukuliwa, ikiwemo kuwaita wasimamizi wa magari ili kuandaa mpango kazi utakaobainisha magari yote yenye changamoto. "Yale magari ambayo tunaona kabisa hatuwezi kuendelea nayo kwa sababu baadhi yake yamechakaa kupita kiasi — hata ukiweka fedha za serikali unakuta baada ya wiki moja gari linaharibika tena — tutajipanga kuyatambua rasmi, kuyatangaza kuwa mali chakavu na kuyaondoa kwa mujibu wa taratibu za kiserikali," alifafanua Bi. Wayayu.
Mstahiki Meya wa Manispaa ya Ilemela, Mheshimiwa Renatus Mulunga, alieleza kuwa tatizo la uchakavu wa magari lilianza tangu Novemba 2012, wakati halmashauri hiyo ilipotenganishwa na Jiji la Mwanza na kutokupokea magari mapya. Hata hivyo, alibainisha kuwa kwa kipindi chote kuanzia mwaka 2015 hadi 2020 na 2020 hadi 2025, halmashauri imekuwa ikiendelea kununua magari mapya kadri bajeti inavyoruhusu. Alisema kuwa licha ya baadhi ya magari kuwa chakavu, bado halmashauri ina magari zaidi ya 30 yanayofanya kazi, ambapo 10 kati yake yapo katika hali nzuri, na mengine yaliyobaki yatafuata utaratibu wa kutangazwa kuwa mali chakavu na kuuzwa.
Mulunga pia alifurahia mafanikio ya Halmashauri ya Ilemela kupata hati safi mfululizo kwa takriban miaka mitano sasa. Alifafanua kuwa siri ya mafanikio hayo ni mshikamano mkubwa uliopo kati ya Baraza la Madiwani, Mkurugenzi, Mbunge na Mkuu wa Wilaya. "Mkitembea pamoja lazima mtafanikiwa. Ukipata halmashauri ambayo Mbunge anasema peke yake, Mkuu wa Wilaya kivyake, Halmashauri kivyake — huo ni utengano. Ilemela tunashirikiana. Hii ndiyo siri ya mafanikio; hoja za CAG zinakwenda na wakati wake. Mfano leo tumezungumzia taarifa ya mwaka 2023/2024, lakini pia kuna hoja nyingine ambazo utekelezaji wake unaendelea kwa miaka iliyopita kama 2021/2022 na 2022/2023, kila moja ina utaratibu wake," alihitimisha Meya Mulunga, akionyesha jinsi ushirikiano unavyochangia katika utendaji bora wa serikali za mitaa.