Mkurugenzi Mtendaji wa Jiji la Dodoma, Dkt. Fredrick Sagamiko, amesema kuwa mradi wa Uendelezaji Miundombinu ya Miji Tanzania (TACTIC) umeleta mabadiliko makubwa na chanya katika jiji hilo, ukisaidia kutatua changamoto nyingi za maendeleo na kuboresha huduma za kijamii. Akizungumza katika mahojiano maalum, Dkt. Sagamiko alifafanua kuwa mradi huo unajumuisha ujenzi na ukarabati wa barabara zenye urefu wa zaidi ya kilomita 10, ambazo zitachangia kurahisisha usafiri na kupunguza gharama kwa wakazi wa Dodoma.
Mbali na barabara, mradi huu pia unalenga kuboresha miundombinu muhimu ya biashara. Ujenzi wa Soko la Majengo unaendelea kwa kasi, na kukamilika kwake kutarahisisha shughuli za wafanyabiashara waliokuwa wakifanya kazi katika mazingira magumu. Soko hilo jipya la kisasa linatarajiwa kuwa na huduma za kutosha, ikiwemo maegesho ya magari na nafasi kubwa zaidi kwa wafanyabiashara, na idadi yao inatarajiwa kuongezeka hadi kufikia wafanyabiashara 875. Dkt. Sagamiko alieleza kuwa soko la awali halikuwa na hadhi inayostahili jiji la Dodoma, hivyo ujenzi wa soko jipya utakuwa ukombozi kwa wananchi.
Maeneo mengine yanayonufaika na mradi huu ni pamoja na ujenzi wa mitaro ya maji katika eneo la Ilazo, ujenzi wa stendi ya daladala huko Nzuguni, pamoja na mnada mpya katika eneo lenye idadi kubwa ya wakazi. Miradi hii yote inalenga kuboresha maisha ya wananchi na kuongeza tija katika shughuli zao za kila siku.
Wafanyabiashara na wakazi wametoka mbele kueleza furaha yao. Rozy Mtundu, mfanyabiashara katika Soko la Majengo, ameeleza kuwa soko jipya litakuza uchumi wao, kwani watafanya biashara katika mazingira bora zaidi. Naye Laurent Munisha ameipongeza serikali kwa juhudi zake, akisema mradi huo utatatua changamoto za muda mrefu. Kwa upande wake, Hamza Zuberi, mkazi wa Mkalama, amesema ujenzi wa barabara katika eneo lao utaongeza thamani ya ardhi na kurahisisha usafiri na usafirishaji.